కడపలో పాత భవనం కూలి ఓ కూలీ మృతి

కడప: కడపలోని నాగరాజుపేటలోని మహిళా కళాశాల వద్ద ఓ పాత భవనం కూలి ఓ కార్మికుడు మృతి చెందగా, పలువురు గాయపడ్డారు. గాయపడినవారిని ఆస్పత్రికి తరలించారు. గాయపడినవారిలో ముగ్గురి పరిస్థితి ఆందోళనకరంగా ఉంది. పాత భవనాన్ని కూలుస్తుండగా సోమవారం ఈ దారుణం సంభవించింది. కూలీలు పని చేస్తుండగా అకస్మాత్తుగా పైకప్పు కూలింది. దీంతో ఇద్దరు కార్మికులు శిథిలాల కింద చిక్కుకున్నారు.

భవనం కూలిన వెంటనే అధికారులు సహాయక చర్యలు చేపట్టారు. శిథిలాల కింద చిక్కుకున్న మహేష్ అనే కూలీ మరణించగా, రాజు అనే కూలీ తీవ్ర గాయాలతో బయటపడ్డాడు. మృతి చెందిన మహేష్ వయస్సు 18 ఏళ్ల లోపే ఉంటుంది. దీంతో భవన యజమానిపై కేసు నమోదు చేస్తున్నట్లు పోలీసులు తెలిపారు.