కృష్ణయ్య, కిషన్ రెడ్డిపై రోశయ్య ఎదురుదాడి

హైదరాబాద్: ఫీజుల చెల్లింపుపై దీక్ష చేస్తున్న బిసి నేత ఆర్. కృష్ణయ్యపై ముఖ్యమంత్రి కె. రోశయ్య ఎదురు దాడికి దిగారు. బిజెపి రాష్ట్రాధ్యక్షుడు జి. కిషన్ రెడ్డిపై కూడా ఆయన విరుచుకుపడ్డారు. ఆదివారం రాత్రి మీడియా సమావేశం ఏర్పాటు చేసి వారిద్దరిపై ఆయన తీవ్రంగా ధ్వజమెత్తారు. ఎవరి ప్రయోజనాలు వారి అంటూ రోశయ్య వ్యాఖ్యానించారు. ఫీజుల చెల్లింపును రాజకీయం చేయవద్దని, ప్రభుత్వ చిత్తశుద్ధిని శంకించవద్దని ఆయన సలహా ఇచ్చారు. ఫీజుల రీయంబర్స్ మెంట్ బకాయిలను చెల్లిస్తామని ఆయన చెప్పారు.

బిజెపి పాలిత రాష్ట్రాల్లో ఏం పథకాలు అమలు చేస్తున్నారో కిషన్ రెడ్డికి తెలియదా అని ముఖ్యమంత్రి అడిగారు. కాగా, ఆర్. కృష్ణయ్య దీక్ష సోమవారం నాలుగో రోజుకు చేరుకుంది. కృష్ణయ్యను గాంధీ ఆస్పత్రిలో వివిధ పార్టీల నాయకులు పరామర్సిస్తున్నారు. తమ డిమాండ్లను నెరవేర్చే వరకు దీక్ష విరమించేది లేదని కృష్ణయ్య చెప్పారు. తన ప్రాణత్యాగంతోనైనా బిసిల్లో ఐక్యత రావాలని ఆయన అన్నారు.