ప్రచారంలో డిఎస్ వీర తెలంగాణవాది పలుకులు

నిజామాబాద్‌: నిజామాబాద్ అర్బన్ శాసనసభా నియోజకవర్గం నుంచి విజయం సాధించడానికి ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ చెమటోడుస్తున్నారు. తీరిక లేకుండా ప్రచారం చేస్తూ ఓటర్లను ఆకట్టుకునే ప్రయత్నాలు చేస్తున్నారు. ఆయన ప్రచారంలో ప్రధాన ఎజెండా తెలంగాణవాదమే కావడం విశేషం. ఆంధ్రప్రదేశ్ అంతటికీ నాయకత్వం వహించాల్సిన బాధ్యత తనపై ఉందని, అందుకే తెలంగాణపై తాను మాట్లాడడం లేదని ఇంతవరకు చెప్పుకుంటూ వచ్చిన డి. శ్రీనివాస్ ఎన్నికల్లో విజయం సాధించడానికి మాత్రమే తనను మించిన తెలంగాణవాది లేడని దండోరా వేయించుకుంటున్నారు. ఇందుకు గాను ఆయన గతంలో తెలంగాణకు జరుగుతున్న అన్యాయంపై శాసనసభలో మాట్లాడిన పలుకులతో వీడియో క్యాసెట్ ను రూపొందించి విడుదల చేశారు.

కాగా, డిఎస్ శ్రీనివాస్ తెలంగాణను తెచ్చేది తానేనని చెబుతున్నారు. తనను మించిన తెలంగాణవాది లేడని, ఈ విషయాన్ని తాను పదే పదే నిరూపించుకోవాల్సిన అవసరం లేదని ఆయన బుధవారం కూడా అన్నారు. 2014 నాటికి తెలంగాణ రావడం ఖాయమని ఆయన చెబుతున్నారు. 2014లో ఆంధ్ర, తెలంగాణ రాష్ట్రాలకు విడివిడిగా ఎన్నికలు జరుగుతాయని ఆయన ప్రజలను నమ్మించే ప్రయత్నం చేస్తున్నారు. మరోవైపు, తాను గెలిస్తే మంచి స్థానంలో ఉంటానని పదే పదే చెబుతున్నారు. తాను గెలిస్తే డిప్యూటీ ముఖ్యమంత్రి కావాలని ప్రజలు కోరుకుంటున్నారని ఆయన తాజాగా బుధవారం నాడు కూడా చెప్పారు. ఉమ్మడి ఆంధ్రప్రదేశ్ రాష్ట్రంలో డిఎస్ డిప్యూటి సిఎం అవుతారని, ఆ తర్వాత తెలంగాణ రాష్ట్రానికి ముఖ్యమంత్రి అవుతారని ఆయన అనుచరులు కూడా ప్రచారం చేస్తున్నారు. ఏమైనా, ఇంత కాలం తెలంగాణ ఊసు కూడా ఎత్తని డిఎస్ ఎన్నికల్లో పోటీ చేయాల్సి వచ్చే సరికి తెలంగాణ పదం తప్ప మరోటి ఎత్తుకోవడం లేదు.