అసెంబ్లీ సమావేశాలను వాయిదా వేయాలి: కోదండరామ్

హైదరాబాద్: ఈ నెల 7వ తేదీ నుంచి తలపెట్టిన శాసనసభా సమావేశాలను వాయిదా వేయాలని తెలంగాణ ఐక్య కార్యాచరణ కమిటీ (జెఎసి) కన్వీనర్ కోదండరామ్ డిమాండ్ చేశారు. రాజకీయ జెఎసి సమావేశానంతరం ఆయన గురువారం మీడియా ప్రతినిధులతో మాట్లాడారు. శాసనసభ సమావేశాలను కాంగ్రెసు పార్టీ ఉప ఎన్నికల ప్రచారానికి వాడుకునే అవకాశం ఉందని ఆయన అనుమానం వ్యక్తం చేశారు. అందువల్ల ఈ సమయంలో శాసనసభా సమావేశాలు నిర్వహించడం సరి కాదని ఆయన అన్నారు.

ఉప ఎన్నికలు ముగిసే వరకు శాసనసభా సమావేశాలను వాయిదా వేయాలని గవర్నర్, స్పీకర్,ఇసిలను కలిసి తాము కోరుతామని ఆయన చెప్పారు. షెడ్యూల్ తో సంబంధం లేకుండా కాంగ్రెసు, తెలుగుదేశం శాసనసభ్యులెవరూ శాసనసభా సమావేశాలకు హాజరు కావద్దని ఆయన కోరారు. ఒకవేళ వారు హాజరైతే వారి దిష్టిబొమ్మలను దగ్ధం చేస్తామని ఆయన చెప్పారు. ఉప ఎన్నికల్లో ప్రయోజనం పొందడానికే పిసిసి అధ్యక్షుడు డి. శ్రీనివాస్ తెలంగాణవాదాన్ని తలకెత్తుకున్నారని ఆయన విమర్శించారు.