రాహుల్ కు మాయావతి షాక్: అమేథీ పేరు మార్పు

లక్నో: ఉత్తరప్రదేశ్ ముఖ్యమంత్రి మాయావతి కాంగ్రెసు పార్లమెంటు సభ్యుడు రాహుల్ గాంధీకి మరో షాక్ ఇచ్చారు. ఆయన లోకసభ స్థానం అమేథీ పేరును మారుస్తూ ఉత్తరప్రదేశ్ ప్రభుత్వం గురువారం ఉత్తర్వులు జారీ చేసింది. అమేథీకి దళిత నేత ఛత్రపతి సాహూజీ మహరాజ్ పేరును పెట్టారు. సాహుజీ మహానగర్ కు జిల్లా హోదా కల్పించాలని ముఖ్యమంత్రి మాయావతి అధ్యక్షతన జరిగిన సమావేశం నిర్ణయం తీసుకుంది.

కాన్పూర్ దేహాత్ కు రమాబాయి నగర్ జిల్లాగా నామకరణం చేయాలని కూడా ఉత్తరప్రదేశ్ ప్రభుత్వం నిర్ణయం తీసుకుంది. 2002 డిసెంబర్ 17వ తేదీన అప్పటి బిఎస్పీ ప్రభుత్వం అమేథీని ఛత్రపతి సాహూజీ మహరాజ్ జిల్లాగా మార్చింది. అయితే, ఆ తర్వాత అధికారంలోకి వచ్చిన సమాజ్ వాదీ పార్టీ ప్రభుత్వం పాత విధానాన్ని పునరుద్దరించింది.