మెగాస్టార్ చిరంజీవి హీరోగా కామెడీ సినిమా

హైదరాబాద్‌: ప్రజారాజ్యం పార్టీ అధినేత చిరంజీవి హీరోగా తెలుగులో ఓ కామెడీ చిత్రం రూపొందుతున్నట్లు ప్రచారం జరుగుతోంది. ప్రజారాజ్యం పార్టీని స్థాపించిన తర్వాత ఆయన సినిమాలకు దూరమయ్యారు. అయితే, సినిమాల్లో నటించాలని పెద్ద యెత్తున ఆఫర్లు వస్తున్నా ఆయన నిరాకరిస్తూ వచ్చారు. అయితే, ప్రస్తుతం ఓ కామెడీ చిత్రంలో నటించడానికి ఆయన అంగీకరించినట్లు తెలుస్తోంది.

చిరంజీవి నటించే కామెడీ చిత్రానికి ఓ ప్రముఖ నిర్మాత దర్శకత్వం వహిస్తున్నట్లు టాలీవుడ్ లో గుసగుసలు వినిపిస్తున్నాయి. కామెడీ చిత్రమే అయినప్పటికీ చిత్రంలో గుర్రపు స్వారీ వంటి స్టంట్లు ఉంటాయని సమాచారం. ఇటీవల తూర్పు గోదావరి జిల్లా పర్యటనలో చిరంజీవి గుర్రపు స్వారీ చేసి ప్రజలను ఉల్లాసపరిచిన విషయం తెలిసిందే. ఈ చిత్రంపై రాజకీయ వర్గాల్లో దుమారం చెలరేగుతోంది.