అరెస్టుకు ప్రయత్నం: విజయశాంతి లొంగిపోతారా?

హైదరాబాద్: తెలంగాణ రాష్ట్ర సమితి (తెరాస) పార్లమెంటు సభ్యురాలు విజయశాంతి కోర్టులో గానీ పోలీసు స్టేషనులో గానీ లొంగిపోయే అవకాశం ఉందని భావిస్తున్నారు. ఆమె ప్రస్తుతం ఆస్పత్రిలో చేరినట్లు తెలుస్తోంది. అదే సమయంలో ముందస్తు బెయిల్ కు ప్రయత్నాలు కూడా సాగిస్తున్నట్లు చెబుతున్నారు. విజయశాంతిని పోలీసులు శనివారం అరెస్టు చేసే అవకాశం ఉన్నట్లు ప్రచారం జరుగుతోంది. విజయశాంతి ఎక్కడికీ పారిపోలేదని తెరాస వర్గాలంటున్నాయి. ఆరెస్టు చేస్తారనే వార్తలు అందుకున్న తెరాస కార్యకర్తలు విజయశాంతి ఇంటికి చేరుకున్నారు. అక్కడ వారు ధర్నా చేస్తూ ప్రభుత్వానికి వ్యతిరేకంగా నినాదాలు చేస్తున్నారు. కాగా, విజయశాంతి పార్టీ అధ్యక్షుడు కె. చంద్రశేఖర రావుతో ఫోన్ మంతనాలు జరిపినట్లు తెలుస్తోంది.

విజయశాంతి అరెస్టుకు పోలీసులు రంగం సిద్ధం చేశారు. అరెస్టు చేసేందుకు పోలీసులు శుక్రవారం విజయశాంతి నివాసానికి వెళ్లారు. అయితే ఆమె ఇంట్లో లేకపోవడంతో పోలీసులు వెనుదిరిగారు. తెలంగాణకు అడ్డం వస్తే అడ్డంగా నరికేయండంటూ చేసిన వ్యాఖ్యను తీవ్రంగా తీసుకున్న ఎన్నికల సంఘం (ఇసి) ఆదేశాల మేరకు పోలీసులు కేసు నమోదు చేసి ఆమెను అరెస్టు చేసేందుకు రంగం సిద్ధం చేశారు.

ఎన్నికల సంఘం ఆదేశాల ప్రకారం తెలంగాణ రాష్ట్ర సమితి (తెరాస) పార్లమెంటు సభ్యురాలు, సినీనటి విజయశాంతిపై పోలీసులు సుమోటోగా గురువారం కేసు నమోదు చేశారు. మాటలతో ప్రజలను రెచ్చగొట్టే వ్యాఖ్య చేసినందుకు ఆమెపై కేసు నమోదు చేయాలని ఈసీ ఆదేశించింది. ఈ మేరకు ఆమె చేసిన వ్యాఖ్యలపై కేసు నమోదు చేయాలని హైదరాబాద్‌లో టీఆర్ఎస్ రాష్ట్ర కార్యాలయం ఉన్న బంజారాహిల్స్ పోలీసులను పోలీసు కమిషనర్ ఏకే ఖాన్ ఆదేశించారు. దీంతో గురువారం రాత్రి పోలీసులు విజయశాంతిపై ఐపీసీ 505(2), 153(ఎ) సెక్షన్‌ల కింద కేసు నమోదు చేశారు.