ఎవరినైనా చంపానా, ఏం తప్పు చేశాను: రాములమ్మ

హైదరాబాద్‌ : తాను ఎవరినైనా చంపానా, తాను ఏం తప్పు చేశానని పోలీసులు తనను అరెస్టు చేయాలని అనుకుంటున్నారని తెలంగాణ రాష్ట్ర సమితి (తెరాస) పార్లమెంటు సభ్యురాలు విజయశాంతి పోలీసులను ప్రశ్నించారు. తాను సిద్ధిపేట వెళ్తున్నానని, తనను పోలీసులు ఎక్కడైనా అరెస్టు చేసుకోవచ్చునని ఆమె శనివారం మీడియా ప్రతినిధుల సమావేశంలో అన్నారు. పోలీసుల తీరు బాధాకరంగా ఉందని, తాను ఇంట్లో లేని సమయంలో ఇళ్లంతా పీకి పందిరేశారని, బీరువాలు కూడా తెరిచారని ఆమె చెప్పారు. తాను ఎవరికీ భయడబోనని, తాను చాలా మొండిదాన్నని ఆమె అన్నారు.

తెలంగాణలో ప్రజలందరూ వాడే నినాదాన్నే తాను వాడానని, తాను ఎవరినీ చంపలేదని ఆమె అన్నారు. తెలంగాణ కోసం తాను ప్రాణత్యాగానికైనా సిద్ధంగా ఉన్నానని ఆమె చెప్పారు. గత 13 ఏళ్లుగా తాను తెలంగాణ కోసం పాటు పడుతున్నానని, తాను ఓ పద్ధతి ప్రకారం నడుచుకుంటున్నానని ఆమె చెప్పారు. తెలంగాణకు అడ్డొస్తే అడ్డంగా నరికేయండి అని అన్నందుకు ఎన్నికల సంఘం విజయశాంతికి నోటీసు కూడా జారీ చేసింది. ఆ మాట అన్నందుకే పోలీసులు కేసు పెట్టి ఆమెను అరెస్టు చేసేందుకు ప్రయత్నిస్తున్నారు.