విజయశాంతి అరెస్టు కాంగ్రెసుకు నష్టమే: శంకర రావు

హైదరాబాద్‌ : తెలంగాణ రాష్ట్ర సమితి (తెరాస) పార్లమెంటు సభ్యురాలు విజయశాంతి అరెస్టు తమ పార్టీకి నష్టమేనని కాంగ్రెసు శాసనసభ్యుడు పి. శంకరరావు అభిప్రాయపడ్డారు. విజయశాంతి అరెస్టును ఆయన శనివారం మీడియా ప్రతినిధుల సమావేశంలో తప్పు పట్టారు. విజయశాంతి అరెస్టు ప్రభావం తెలంగాణలోని ఉప ఎన్నికలపై పడుతుందని ఆయన అన్నారు. కాంగ్రెసుకు చెడ్డ పేరు వస్తుందని ఆయన అన్నారు.

విజయశాంతి మాటల్లో తప్పు లేదని, తెలంగాణలోని ఊతపదాలనే ఆమె వాడారని శంకర రావు అన్నారు. తెరాస పార్టీ కార్యాలయంలో మాట్లాడితే విజయశాంతిని అరెస్టు చేశారని, ఇది దురదృష్టకరమని ఆయన అన్నారు. నిన్న విజయశాంతి ఎక్కడున్నారో కూడా పోలీసులు కనుక్కోలేకపోయారని ఆయన అన్నారు.