14 రోజుల రిమాండ్: చంచల్ గుడా జైలుకు రాములమ్మ

హైదరాబాద్‌: కోర్టు ఆదేశాల మేరకు పోలీసులు తెలంగాణ రాష్ట్ర సమితి (తెరాస) పార్లమెంటు సభ్యురాలు విజయశాంతిని హైదరాబాదులోని చంచల్ గుడా మహిళా జైలుకు తరలించారు. హైదరాబాదులోని బంజారా హిల్స్ లో అరెస్టు చేసి విజయశాంతిని పోలీసులు హైదరాబాదులోని నాంపల్లి రెండో అదనపు మెట్రోపాలిటన్ మెజిస్ట్రేట్ ముందు హాజరు పరిచారు. ఆమెకు 14 రోజుల రిమాండ్ విధిస్తూ మెజిస్ట్రేట్ ఆదేశాలు జారీ చేశారు. దీంతో ఆమెను చంచల్ గుడా జైలుకు తరలించారు.

బెయిల్ పిటిషన్ వేయడానికి విజయశాంతి నిరాకరించారు. అరెస్టు చేసే సమయంలో ఎసిపి చంద్రమౌళి తన పట్ల అనుచితంగా ప్రవర్తించారని ఆమె ఆరోపించారు. తనను అరెస్టు చేయడానికి మహిళా పోలీసులను కూడా తీసుకు రాలేదని ఆమె విమర్సించారు. ఈ విషయాన్ని ఆమె మెజిస్ట్రేట్ చెప్పారు. తాను అంతర్గత సమావేశంలోనే మాట్లాడానని, తెలంగాణ ప్రజలు ఇచ్చే నినాదాన్ని తాను వాడానని, అది రెచ్చగొట్టే ప్రకటన కాదని విజయశాంతి వాదించారు. పోలీసులు తనపై కుట్రపూరితంగా వ్యవహరిస్తున్నారని ఆమె ఆరోపించారు.