సిద్ధిపేటలో హరీష్ రావుతో బాబూ మోహన్ ఢీ

హైదరాబాద్‌: మెదక్ జిల్లా సిద్ధిపేట శాసనసభా స్థానంలో తెలంగాణ రాష్ట్ర సమితి (తెరాస) నాయకుడు హరీష్ రావును తెలుగుదేశం పార్టీ తరఫున సినీ నటుడు బాబూ మోహన్ ఢీకొట్టనున్నారు. ఈ నెల 27వ తేదీన జరిగే తెలంగాణ ఉప ఎన్నికలకు తెలుగుదేశం పార్టీ అధ్యక్షుడు నారా చంద్రబాబు నాయుడు నేడో, రేపో అభ్యర్థులను ప్రకటించనున్నారు. ఇప్పటికే అభ్యర్థులను ఆయన ఖరారు చేసినట్లు సమాచారం. పొలిట్ బ్యూరోలో, సీనియర్ నాయకుల సమావేశంలో ఆయన అభ్యర్థుల ఖరారుపై విస్తృతంగా చర్చించారు.

సిద్ధిపేటలో హరీష్ రావుపై బాబూ మోహన్ ను పోటీకి దించాలని చంద్రబాబు నిర్ణయించినట్లు సమాచారం. నిజామాబాద్ అర్బన్ నియోజకవర్గంలో ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ పై అరిగెల నర్సారెడ్డిని పోటీకి దించనున్నారు. మైనారిటీ నాయకుడు అలీంను పోటీకి దించి మైనారిటీ ఓట్లకు గండి కొట్టడం ద్వారా డిఎస్ ను ఓడించాలని చంద్రబాబు ఆలోచించారు. అయితే అలీం పోటీకి నిరాకరించడంతో నర్సారెడ్డి పేరును ఆయన ఖరారు చేశారు.