నడిరోడ్డుపై బైఠాయించిన చంద్రబాబు నాయుడు: అరెస్టు

హైదరాబాద్‌: పెట్రో ఉత్పత్తుల పెంపునకు నిరసనగా ప్రతిపక్షాలు తలపెట్టిన బంద్ సందర్భంగా తెలుగుదేశం పార్టీ అధ్యక్షుడు నారా చంద్రబాబు నాయుడు హైదరాబాదులో రోడ్డుపై బైఠాయించారు. హైదరాబాదులోని అమీర్ పేటలో ఆయన రోడ్డుపై బైఠాయించి తన నిరసనను తెలిపారు. కొద్దిసేపటి తర్వాత చంద్రబాబును పోలీసులు అరెస్టు చేశారు. ఆయన అరెస్టు సందర్భంగా తీవ్ర ఉద్రిక్తత నెలకొంది. పోలీసులను అడ్డుకోవడానికి పార్టీ కార్యకర్తలు ప్రయత్నించారు. కార్యకర్తలను పక్కకు నెట్టి చంద్రబాబును వాహనంలో ఎక్కించి పోలీసు స్టేషనుకు తరలించారు.

అంతకు ముందు పార్టీ దీక్ష శిబిరానికి చంద్రబాబు చేరుకున్నారు. ఆ సమయంలో తెలుగుదేశం పార్టీ కార్యకర్తలు వాహనాల టైర్లలో గాలి తీసేయడానికి ప్రయత్నించారు. వారిని చెదరగొట్టడానికి పోలీసులు ప్రయత్నించారు. దాంతో తీవ్ర ఉద్రిక్తత నెలకొంది. దీంతో చంద్రబాబు పోలీసులను తోసుకుంటూ రోడ్డుపైకి వచ్చి బైఠాయించారు. ట్రాఫిక్ కు తీవ్ర అంతరాయం కలగడంతో పోలీసులు చంద్రబాబును అరెస్టు చేశారు. హైదరాబాదులోని రాస్తారోకోకు దిగిన సిపిఐ రాష్ట్ర కార్యదర్శి కె. నారాయణ, సిపిఎం రాష్ట్ర కార్యదర్శి బివి రాఘవులును పోలీసులు అరెస్టు చేశారు.