వైయస్ జగన్ తో నాకు గ్యాప్ లేదు: సిఎం రోశయ్య

హైదరాబాద్: తమ కాంగ్రెసు పార్టీ పార్లమెంటు సభ్యుడు వైయస్ జగన్ తో తనకు ఎలాంటి గ్యాప్ లేదని, తమ మధ్య వయస్సు గ్యాప్ మాత్రమే ఉందని ముఖ్యమంత్రి కె. రోశయ్య అన్నారు. తాను కాంగ్రెసుకు చెందిన ముఖ్యమంత్రిని అని, జగన్ కాంగ్రెసుకు చెందిన పార్లమెంటు సభ్యుడని ఆయన అన్నారు. రేపటి నుంచి అసెంబ్లీ సమావేశాలు జరుగుతున్న నేపథ్యంలో అందుబాటులో ఉన్న మంత్రులతో భేటీ తర్వాత ఆయన మీడియా ప్రతినిధులతో మాట్లాడారు. వైయస్ రాజశేఖర రెడ్డి జయంతి వేడుకల్లో మంత్రులు వారి వీలును బట్టి ఎక్కడైనా పాల్గొనవచ్చునని ఆయన చెప్పారు. శాసనసభలో వీలును బట్టి తాను స్పీకర్ అనుమతి తీసుకుని వైయస్ కు నివాళులు అర్పిస్తానని ఆయన చెప్పారు.

ఈ నెల 8వ తేదీన సిఎల్పీ కార్యాలయంలో, సాయంత్రం రవీంద్ర భారతిలో వైయస్ జయంతి వేడుకలు జరుగుతున్నాయని ఆయన చెప్పారు. జగన్ ఓదార్పు యాత్ర విషయాన్ని పార్టీ అధిష్టానం చూసుకుంటుందని, తాను అందులో తలదూర్చబోనని ఆయన చెప్పారు. ఉప ఎన్నికల ప్రచారంలో తాను ప్రచారం చేయాలా, వద్దా అనే విషయంపై ఇంకా నిర్ణయం తీసుకోలేదని ఆయన చెప్పారు. ఉప ఎన్నికలు జరుగుతున్న జిల్లాల్లో మంత్రులు, శాసనసభ్యులు అధికారిక కార్యక్రమాల్లో పాల్గొనకుండా జాగ్రత్త వహించాలని ఆయన సూచించారు.