ఇసి వద్ద వైయస్సార్ కాంగ్రెసు పార్టీ రిజిస్ట్రేషన్ కు దరఖాస్తు

న్యూఢిల్లీ: వైయస్సార్ కాంగ్రెసు పేరిట కొత్త రాజకీయ పార్టీ రిజిస్ట్రేషన్ కోసం ఎన్నికల కమిషన్ కు దరఖాస్తు అందింది. ఈ దరఖాస్తు నెల రోజుల క్రితమే ఇసికి అందింది. రాయలసీమకు చెందిన ఓ ప్రముఖ వ్యక్తి ఈ దరఖాస్తు చేసుకున్నట్లు ఇసి వర్గాలు చెబుతున్నాయి. నవంబర్ 13వ తేదీ ఇసికి ఆ దరఖాస్తు అందింది. దానిపై ఇసి అదనపు సమాచారాన్ని అడిగింది. అదనపు సమాచారంతో మరో దరఖాస్తు నెల క్రితం ఇసికి అందింది.

కాంగ్రెసు కడప పార్లమెంటు సభ్యుడు వైయస్ జగన్ మనుషులు ఈ దరఖాస్తు చేశారా, మరెవరైనా దరఖాస్తు చేశారా అనే విషయం తెలియడం లేదు. గతంలో చిరంజీవి ప్రజారాజ్యం పార్టీని స్థాపించడానికి ముందు ఓ వ్యక్తి దాన్ని రిజిష్టర్ చేసి పెట్టాడు. అతని నుంచి చిరంజీవి ఆ రిజిస్ట్రేషన్ పత్రాలను మార్చుకోవాల్సి వచ్చింది. అయితే, చాలా కాలంగా వైయస్సార్ కాంగ్రెసు పేరిట వైయస్ జగన్ పార్టీ పెడతారనే ప్రచారం చాలా కాలంగానే సాగుతోంది.