వైయస్ జగన్ కాంగ్రెసులో కొనసాగడం సాధ్యమా?

హైదరాబాద్: కడప పార్లమెంటు సభ్యుడు వైయస్ జగన్ కాంగ్రెసు పార్టీలో కొనసాగడం సాధ్యమవుతుందా అనేది ప్రస్తుతం తలెత్తుతున్న ప్రశ్న. కయ్యానికి కాలు దువ్వుతూ, పార్టీ అధినేత్రినే ధిక్కరించే దాకా వెళ్లిన ఆయన ఇక కాంగ్రెసులో కొనసాగడానికి అవకాశాలు తక్కువేనని అంటున్నారు. సోనియా సూచనలను కూడా ధిక్కరిస్తూ ఆయన బుధవారం సాయంత్రం శ్రీకాకుళం జిల్లాలో ఓదార్పు యాత్ర చేపట్టేందుకు బయలుదేరుతున్నారు. పార్టీ అధికార ప్రతినిధులు అభిషేక్ మను సింఘ్వీ, మనీష్ తివారీ, జనార్దన్ ద్వివేది, పార్టీ సీనియర్ నేత కిశోర్ చంద్రదేవ్ మాట్లాడిన తీరు జగన్ కు పార్టీలో చోటు లేదనే విషయాన్ని ధ్రువీకరిస్తున్నాయి. ఆయన పార్టీలో కొనసాగాలంటే అణగిమణిగి ఉండాల్సిందే. మొదట్లో వెనక్కి తగ్గితే పరిస్థితి వేరే విధంగా ఉండేదని, ఇప్పుడు వెనక్కి తగ్గి పార్టీలో కొనసాగినా జగన్ కు అవకాశాలు రావడం సాధ్యం కాదని అంటున్నారు.

పార్టీ అధిష్టానానికి చెందిన నాయకులతోనే కాకుండా సోనియాతో కూడా సంబంధాలను చెడగొట్టుకున్న జగన్ ఇక పార్టీలో కొనసాగడం ఏ మాత్రం సాధ్యం కాదనే అభిప్రాయం వ్యక్తమవుతోంది. ఇంత దూరం వచ్చి జగన్ వెనక్కి తగ్గి సోనియా మాటలను శిరసా వహిస్తారని కూడా అనుకోవడానికి లేదు. జగన్ లో పనిచేస్తున్న ఆధిక్య భావన అందుకు ఆయనను పురికొల్పే పరిస్థితి లేదు. పార్టీ అధిష్టానం చర్యలు తీసుకోవడమా, తనంత తానుగా జగన్ దారి వేరే దారి చూసుకోడమా అనేది మిగిలి ఉందని అంటున్నారు.