నేను చేసిన తప్పేమిటో చెప్పండి: జగన్ అదే ధిక్కారం

కాకినాడ: కాంగ్రెసు పార్టీ కడప పార్లమెంటు సభ్యుడు వైయస్ జగన్ పార్టీ అధిష్టానంపై అదే ధిక్కార స్వరాన్ని వినిపిస్తున్నారు. గురువారం ఏలేశ్వరంలో ఆయన కాంగ్రెసు పార్టీ నాయకత్వాన్ని నిలదీశారు. తాను చేసిన తప్పేమిటో చెప్పాలని ఆయన అడిగారు. తమ ప్రియతమ నాయకుడు వైయస్ రాజశేఖర రెడ్డి ఆకస్మిక మరణాన్ని తట్టుకోలేక గుండె పగిలి మరణించినవారి కుటుంబాలను పరామర్శిస్తానని తాను పావురాల గుట్టలో హామీ ఇచ్చానని, ఆ హామీ మేరకే తాను ఓదార్పు యాత్ర చేపట్టానని అంటూ ఇందులో తాను చేసిన తప్పేమిటో చెప్పాలని ఆయన అడిగారు.

పత్తిపాడు మాజీ శాసనసభ్యుడు సుబ్బారావు మరో అడుగు ముందుకేసి కాంగ్రెసుపై విమర్శల వర్షం కురిపించారు. శాసనసభ్యులు, మంత్రులు జగన్ ను బలపరుస్తున్నారని ఆయన చెప్పారు. జగన్ నాయకత్వం వల్ల మాత్రమే కాంగ్రెసు పార్టీకి భవిష్యత్తు ఉంటుందని ఆయన అన్నారు. కాంగ్రెసు పార్టీ జగన్ కు నాయకత్వ బాధ్యతలు అప్పగించకుండా అన్యాయం చేస్తోందని ఆయన అన్నారు.