గాలి బ్రదర్స్ ఎపిసోడ్:భరద్వాజ్ తో సిఎం యెడ్యూరప్ప భేటీ

బెంగళూరు: మంత్రులు గాలి బ్రదర్స్ వ్యవహారం వల్ల కర్ణాటకలో నెలకొన్న పరిస్థితుల దృష్ట్యా ఆ రాష్ట్ర ముఖ్యమంత్రి యెడ్యూరప్ప గవర్నర్‌ భరద్వాజ్‌తో భేటీ అయ్యారు. అసెంబ్లీలో కొద్దిరోజులుగా కాంగ్రెస్‌, జేడీ(ఎస్‌) పార్టీలు నిరసన చేపట్టిన నేపథ్యంలో ఆయన గవర్నర్‌ను కలిశారు. ఈ భేటీ అనంతరం యెడ్యూరప్ప మీడియాతో మాట్లాడారు. అక్రమ మైనింగ్‌ విషయంలో సీబీఐ దర్యాప్తునకు ఆయన నిరాకరించారు. తమ ప్రభుత్వం లోకాయుక్తను బలోపేతం చేస్తుందని ఆయన అన్నారు.

ఇనుప ఖనిజం ఎగుమతులను పూర్తిగా నిషేధించేందుకు గానూ అన్ని పార్టీల సభ్యులు కలసి రావాలని అన్నారు. అసెంబ్లీ కార్యక్రమాలను అడ్డుకునే బదులు ఆయన నేతృత్వంలో ప్రధానమంత్రిని కలవనున్న బృందంలో చేరాలని కోరారు. అసెంబ్లీ కార్యక్రమాలు సజావుగా జరగకుండా అడ్డుపడడమే విపక్షాల లక్ష్యమని ఆయన విమర్శించారు.