వైయస్ జగన్ ప్రజాకర్షణ ఉన్న నాయకుడు: చిరంజీవి

తిరుపతి: కాంగ్రెసు కడప పార్లమెంటు సభ్యుడు వైయస్ జగన్ ప్రజాకర్షణ ఉన్న నాయకుడని ప్రజారాజ్యం పార్టీ అధినేత చిరంజీవి అన్నారు. దివంగత నేత వైయస్ రాజశేఖర రెడ్డి చరాష్మిటిక్ నాయకుడని, ఆ చరిష్మా జగన్ విషయంలో కొనసాగుతోందని ఆయన శనివారం మీడియా ప్రతినిధుల సమావేశంలో అన్నారు. జగన్ కు చెక్ పెట్టడానికి తనను కాంగ్రెసు చెలిమి చేస్తోందని వార్తల్లో నిజం లేదని ఆయన అన్నారు. జగన్ కు చెక్ పెట్టేందుకు నాతో కాంగ్రెసు చెలిమి చేస్తోందని మీరు వార్తలు రాసి నన్ను సమాధానం చెప్పాలని అడిగితే ఏ విధంగా సమంజసమని ఆయన ప్రశ్నించారు.

తిరుమల తిరుపతి దేవస్థానం (టిటిడి) అక్రమాలపై పోరాటం చేయడానికి సినీ నటుడు మోహన్ బాబు ముందుకు రావడం మంచి పరిణామమని ఆయన అన్నారు. టిటిడిని ప్రక్షాళన చేసే వరకు తాను పోరాటం సాగిస్తానని ఆయన చెప్పారు. టిటిడి అక్రమాలపై సుప్రీంకోర్టు న్యాయమూర్తితో విచారణ జరిపించాలని లేదా దర్యాప్తునకు సిబిఐకి అప్పగించాలని ఆయన రాష్ట్ర ప్రభుత్వాన్ని డిమాండ్ చేశారు.