మహా పోలీసుల తీరు తెలుగుజాతికి అవమానం: చిరంజీవి

హైదరాబాద్: బాబ్లీ ప్రాజెక్టు సందర్శనకు వెళ్లిన తెలుగుదేశం పార్టీ నాయకుల పట్ల మహారాష్ట్ర ప్రభుత్వం వ్యవహరించిన తీరు తెలుగుజాతికే అవమానమని ప్రజారాజ్యం పార్టీ అధ్యక్షుడు చిరంజీవి వ్యాఖ్యానించారు. ధర్మాబాద్ లో తెలుగుదేశం నేతలపై మహారాష్ట్ర పోలీసులు జరిపిన లాఠీచార్జీని ఆయన మంగళవారం మీడియా ప్రతినిధుల సమావేశంలో ఖండించారు. మహారాష్ట్ర పోలీసుల దాడి అప్రజాస్వామికమని ఆయన అన్నారు. మహిళా నేతలపైనా పోలీసులు అమానుషంగా ప్రవర్తించారని ఆయన అన్నారు. మహారాష్ట్ర పోలీసుల తీరుపై ప్రధాని డాక్టర్ మన్మోహన్ సింగ్ కు లేఖ రాయనున్నట్లు ఆయన తెలిపారు. బాబ్లీ ఏరియల్ సర్వేకు అనుమతించాలని ఆయన కోరారు.

చంద్రబాబు సహా తెలుగుదేశం నేతల పట్ల మహారాష్ట్ర ప్రభుత్వం వ్యవహరించిన తీరు పట్ల బిజెపి సీనియర్ నాయకుడు వెంకయ్య నాయుడు తీవ్ర ఆక్షేపణ తెలిపారు. తన రాజకీయ జీవితంలో ఇటువంటి సంఘటనను చూడలేదని ఆయన మంగళవారం మీడియా ప్రతినిధులతో అన్నారు. బాబ్లీని సందర్శించడానికి వెళ్తే తప్పేమిటని ఆయన అడిగారు.