సత్యం కేసు: రామలింగరాజు మినహా ఐదుగురికి బెయిల్

హైదరాబాద్‌: సత్యం కంప్యూటర్స్ కుంభకోణంలో మరో ఐదుగురు నిందితులకు హైకోర్టు మంగళవారం బెయిల్‌ మంజూరు చేసింది. దీంతో రామలింగరాజు మినహా ఈ కేసులోని మిగతా 9మంది నిందుతులకి బెయిల్‌ మంజూరైంది. రామలింగరాజు సోదరుడు రామరాజు, మాజీ సీఎఫ్‌వో వడ్లమాని శ్రీనివాస్‌, అంతర్గత ఆడిట్‌ విభాగం వైస్‌ప్రెసిడెంట్‌ రామకృష్ణ, సత్యం మాజీ ఉద్యోగులు శ్రీశైలం, వెంకటపతిరాజులకు ఈరోజు హైకోర్టు బెయిల్‌ మంజూరు చేసింది.

రామలింగరాజు మరో సోదరుడు సూర్యనారాయణ ముందస్తు బెయిల్‌పై ఉండగా, ఆడిటర్‌ తాళ్లూరి శ్రీనివాస్‌ సుప్రీంకోర్టు నుంచి గతంలోనే బెయిల్‌ పొందారు. ప్రైస్‌ వాటర్‌ హౌజ్‌ కూపర్స్‌ ఆడిటర్‌ ఎస్‌. గోపాలకృష్ణన్‌, వీఎస్‌ ప్రభాకర్‌ గుప్తాలకు ఇప్పటికే హైకోర్టు బెయిల్‌ మంజూరు చేసింది. రామలింగ రాజు నిజాం వైద్య విజ్ఞాన సంస్థ (నిమ్స్)లో చికిత్స పొందుతున్నాడు.