బీహార్ అసెంబ్లీలో స్పీకర్ పైకి చెప్పులు: ఎమ్మెల్యేల సస్పెన్షన్

పాట్నా: బీహార్ శాసనసభ బుధవారం రణరంగంగా మారింది. స్పీకర్ పైకి ప్రతిపక్షాల సభ్యులు చెప్పులు విసరిరారు. ప్రతిపక్ష సభ్యుల ఆందోళనతో తీవ్ర గందరగోళం చెలరేగింది. దీంతో స్పీకర్ ఉదయ్ నారాయణ్ 16 మంది ప్రతిపక్ష సభ్యులను వర్షాకాలం సమావేశాలంతటికీ సస్పెండ్ చేశారు. ఉభయ సభల సభ్యులు 80 మంది గత రాత్రి శాసనసభలోనే నిద్రించారు. బుధవారం ఉదయం సభ సమావేశమైన తర్వాత సభ్యులు గందరగోళం సృష్టించారు.

సస్పెండ్ అయిన శాసనసభ్యుల్లో ఆర్జెడీ అధ్యక్షుడు అబ్దుల్ బారీ సిద్దిఖి, శాసనసభలో ఆర్జెడీ డిప్యూటీ నాయకుడు షకీల్ అహ్మద్ ఖాన్ కూడా ఉన్నారు. మంగళవారం కూడా బీహార్ అసెంబ్లీలో గందరగోళం చెలరేగింది. కుర్చీలను, బల్లలను తోసేశారు. మెక్రోఫోన్లను విరగ్గొట్టారు. కాగా నివేదికపై అధికార, ప్రతిపక్ష సభ్యుల మధ్య దాదాపుగా ముష్టి యుద్ధం జరిగే పరిస్థితి నెలకొంది.