చంద్రబాబు మూడు పిట్టలు కొట్టారు: సిపిఐ నేత నారాయణ

హైదరాబాద్: బాబ్లీ వ్యతిరేక పోరాటం ద్వారా తెలుగుదేశం పార్టీ అధ్యక్షుడు నారా చంద్రబాబునాయుడు మూడు పిట్టలను కొట్టారని సిపిఐ రాష్ట్ర కార్యదర్శి కె. నారాయణ వ్యాఖ్యానించారు. కేంద్ర, మహారాష్ట్ర, ఆంధ్రప్రదేశ్ ప్రభుత్వాల తీరును ఎండగట్టడంలో చంద్రబాబు విజయం సాధించారని ఆయన అన్నారు. శాసనసభ ఆవరణలోని గాంధీ విగ్రహం వద్ద తెలుగుదేశం ప్రజాప్రతినిధుల చేపట్టిన ధర్నా కార్యక్రమంలో ఆయన ప్రసంగించారు. గోదావరి నదిపై మహారాష్ట్ర ప్రభుత్వం అక్రమంగా నిర్మిస్తున్న బాబ్లీ ప్రాజెక్టుకు వ్యతిరేకంగా చేపట్టిన తెలుగుదేశం ఉద్యమానికి ఆయన మద్దతు ప్రకటించారు.

బాబ్లీ సందర్శనకు తెలుగుదేశం జట్టును అనుమతించకపోవడాన్ని ఆయన తప్పు పట్టారు. అక్కడేమైనా చట్ట వ్యతిరేక కార్యకలాపాలు జరుగుతున్నాయా అని ఆయన అడిగారు. చంద్రబాబు 9 ఏళ్లు ముఖ్యమంత్రిగా పనిచేశారని, జాతీయ నాయకుడిగా ఉన్నారని, అటువంటి నాయకుడి పట్ల మహారాష్ట్ర ప్రభుత్వం వ్యవహరించిన తీరు సరి కాదని ఆయన అన్నారు. తలకాయలో మెదడు ఉన్నవారెవరూ మహారాష్ట్ర ముఖ్యమంత్రి అశోక్ చవాన్ లాగా వ్యవహరించబోరని ఆయన వ్యాఖ్యానించారు.