చవాన్ గారూ, బాబు మీ బావ మరిదా: బాల్ థాకరే

ముంబై: బాబ్లీ వ్యతిరేక పోరాటంలో భాగంగా వచ్చిన తెలుగుదేశం అధ్యక్షుడు నారా చంద్రబాబునాయుడి పట్ల తమ మహారాష్ట్ర ప్రభుత్వం మెతగ్గా వ్యవహరించిందని శివసేన చీఫ్ బాల్ థాకరే ధ్వజమెత్తారు. చంద్రబాబు మీ బావ మరిదా, వ్యాపార భాగస్వామియా అని ఆయన మహారాష్ట్ర ముఖ్యమంత్రి అశోక్ చవాన్ ను ప్రశ్నించారు. కాంగ్రెసు పార్లమెంటు సభ్యుడు జగన్ ర్యాలీల నుంచి ఆంధ్రప్రదేశ్ లో దృష్టి మళ్లించడానికి చవాన్ చంద్రబాబును అనుమతించారని ఆయన విమర్శించారు.

చంద్రబాబుపై, ఆయన అనుచరులపై ప్రభుత్వం కఠిన చర్యలు తీసుకోవాలనుకుంటే ఈ నెల 16వ తేదీన రాష్ట్రంలోకి ప్రవేశించిన రోజునే తీసుకుని ఉండేదని థాకరే అన్నారు. శివసేన అధికార పత్రిక సామ్నాలో రాసిన సంపాదకీయంలో ఆయన ఈ వ్యాఖ్యలు చేశారు. ఔరంగాబాద్ కు తరలించే ముందు చంద్రబాబుకు జైలు దుస్తులు ధరింపజేయాల్సి ఉండిందని ఆయన అన్నారు. చంద్రబాబుకు చిప్ప కూడు పెట్టాల్సిందని ఆయన అన్నారు. మగ్గు నీళ్లు పోయాల్సిందని ఆయన అన్నారు. అలా చేసి ఉంటే తొలి రోజే జైలు తాళాలు పగులగొట్టి పారిపోయి ఉండేవారని ఆయన అన్నారు.