కీచక టీచర్ అయూబ్ అరెస్టు: ఓ కెన్యా బాలిక కూడా ఫిర్యాదు

హైదరాబాద్‌: విద్యాసంస్థలోని బాలికపై నాలుగు నెలల పాటు అత్యాచారానికి పాల్పడిన పార్క్ వుడ్ డైరెక్టర్ మహ్మద్ సలావుద్దీన్ అయూబ్ ను పోలీసులు అరెస్టు చేశారు. అతన్ని పోలీసులు శుక్రవారం కోర్టులో ప్రవేశపెట్టారు. రంగారెడ్డి జిల్లాలోని వికారాబాద్ లో గల పార్క్ వుడ్ డైరెక్టర్ ఓ బాలికపై నాలుగు నెలల పాటు అత్యాచారానికి పాల్పడినట్లు ఆరోపణలు వచ్చిన విషయం తెలిసిందే. ముంబైలో ఉండే తల్లిదండ్రులకు సమాచారం తెలియడంతో వారు పోలీసులకు ఫిర్యాదు చేశారు. దీంతో రెండు రోజుల క్రితమే పోలీసులు అతన్ని అదుపులోకి తీసుకున్నట్లు తెలుస్తోంది.

లైంగిక అత్యాచారానికి సంబంధించిన ఆరోపణలపై పోలీసులు ప్రాథమిక విచారణ జరిపారు. బాలికను వైద్యపరీక్షలకు పంపారు. అయూబ్ కు వైద్య పరీక్షలు నిర్వహించారు. తనపై వచ్చిన ఆరోపణల్లో నిజం లేదని, తనను ఇందులో ఇరికించారని అయూబ్ మీడియా ప్రతినిధులతో అన్నాడు. తాను ఇప్పుడేమీ మాట్లాడలేనని, తగిన సమయంలో మాట్లాడుతానని అతను అన్నాడు. కాగా, కెన్యాకు చెందిన ఓ బాలిక కూడా అయూబ్ పై ఫిర్యాదు చేసింది.