ఓదార్పులో వెంటరాని ఎమ్మెల్యేలకు జగన్ చురక

కాకినాడ: ఓదార్పు యాత్రలో తన వెంట రాని శాసనసభ్యులకు కాంగ్రెసు కడప పార్లమెంటు సభ్యుడు వైఎస్ జగన్మోహన్‌రెడ్డి చురకలంటించారు. అసహనం వ్యక్తం చేశారు. ఓదార్పు యాత్రలో తనకు తోడుగా ఉంటామని చెప్పడానికే కొందరు నాయకులు భయపడుతున్నారని వ్యాఖ్యానించారు. 12వ రోజు ఓదార్పు యాత్రలో శుక్రవారం ఆయన తూర్పుగోదావరి జిల్లాలో రాజోలు ఎమ్మెల్యే రాపాక వరప్రసాద్ స్వగ్రామం చింతలమోరిని సందర్శించారు. వైఎస్ రాజశేఖరరెడ్డి విగ్రహాన్ని ఆవిష్కరించారు. ఈ సందర్భంగా ఆయన మాట్లాడారు.

చాలా మంది నేతలు తన వెంట ఉన్నామని చెప్పడానికే భయపడుతున్న పరిస్థితుల్లో ఎమ్మెల్యే వరప్రసాద్ ఓదార్పు యాత్రలో తన వెంట ఉండటాన్ని కొనియాడారు. మారుమూల ప్రాంతం నుంచి వచ్చిన వరప్రసాద్ కు ఎన్ని బెదిరింపులు వచ్చినా లొంగకుండా తన వెన్నంటి ఉన్నారని, ఆయన రుణం ఎన్నటికీ తీర్చుకోలేనని జగన్ పొగడ్తలతో ముంచెత్తారు. తన పట్ల ప్రజలు చూపుతున్న ప్రేమానురాగాలకు ఆజన్మాంతం రుణపడి ఉంటానని ఆయన చెప్పారు.