బాబ్లీ ప్రాజెక్టుపై ఢిల్లీలో చంద్రబాబు హల్ చల్

న్యూఢిల్లీ: గోదావరి నదిపై మహారాష్ట్ర ప్రభుత్వం అక్రమంగా నిర్మిస్తున్న బాబ్లీ ప్రాజెక్టుకు వ్యతిరేకంగా తెలుగుదేశం అధ్యక్షుడు నారా చంద్రబాబు నాయుడు జాతీయ నేతల మద్దతును కూడగట్టడంలో మునిగిపోయారు. వివిధ పార్టీల జాతీయ నాయకులను ఆయన సోమవారం కలుసుకున్నారు. జెడియు నేత శరద్ యాదవ్ ను ఆయన కలుసుకున్నారు. ఆ తర్వాత సిపిఎం ప్రధాన కార్యదర్శి ప్రకాష్ కారత్ తో భేటీ అయ్యారు. వివిధ పార్టీల నాయకుల మద్దతును కూడగట్టుకోవడానికి ఆయన ఆదివారంనాడే ఢిల్లీకి చేరుకున్నారు. ఆయన ఆదివారం సిపిఐ ప్రధాన కార్యదర్శి ఎబి బర్దన్ ను కలుసుకున్నారు. సోమవారం సాయంత్రం ప్రధానితో అఖిల పక్ష సమావేశం జరిగే లోగా జాతీయ నేతల మద్దతును ఆయన కూడగడుతున్నారు.

కాగా, బాబ్లీపై ప్రభుత్వ విధానానికి వ్యతిరేకంగా తెలుగుదేశం పార్లమెంటు సభ్యులు సోమవారం ఉదయం పార్లమెంటు ఆవరణలో ధర్నాకు దిగారు. బాబ్లీ బచావో అంటూ వారు నినాదాలు చేశారు. బాబ్లీ ప్రాజెక్టును అపించాలని వారు డిమాండ్ చేశారు. బాబ్లీ ప్రాజెక్టుకు వ్యతిరేకంగా వారు ప్లకార్డులు ప్రదర్శించారు.