కలెక్టర్, ఆర్డీవోలకు ప్రసారాలు నిలిపేసే అధికారం ఉంది: ఐవి

హైదరాబాద్‌: నిబంధనలకు విరుద్ధంగా ప్రసారాలు చేస్తుంటే వాటిని ఆపేసే అధికారం కలెక్టర్, ఆర్డీవోలకు ఉంటుందని రాష్ట్ర ఎన్నికల ప్రధానాధికారి ఐవి సుబ్బారావు అన్నారు. పరిస్థితులను బట్టి నిర్ణయం తీసుకునే విచక్షణాధికారం వారికి ఉంటుందని ఆయన అన్నారు. నిజామాబాద్ లో టీవీ ప్రసారాలను ఆపేడయంపై ఆయన మంగళవారం ఆ వివరణ ఇచ్చారు. నిజామాబాద్ లో న్యూస్ చానెల్ ప్రసారాలను కలెక్టర్, ఆర్డీవోల నిర్ణయం మేరకే నిలిపేసినట్లు ఆయన తెలిపారు. పోలింగ్ ముగిసే వరకు ఆంక్షలు ఉంటాయని, ఆ తర్వాత స్వేచ్ఛ ఉంటుందని ఆయన చెప్పారు.

పోలింగ్ ముగిసే వరకు అభ్యర్థులు టీవీ చానెల్స్ ద్వారా, రేడియో ద్వారా మాట్లాడకూడదని, ఇంటర్వ్యూలు ఇవ్వకూడదని ఆయన అన్నారు. అభ్యర్థులు ఇంటర్వ్యూలు ప్రసారం చేస్తే న్యూస్ చానెల్స్ పైన, అభ్యర్థులపైన కేసులు పెడతామని ఆయన హెచ్చరించారు. అవాంఛనీయ సంఘటనలు జరగకుండా చర్యలు తీసుకున్నట్లు ఆయన తెలిపారు.