లగడపాటి సర్వే: తెలంగాణ ఉప ఎన్నికల్లో తెరాసదే విజయమట

న్యూఢిల్లీ: తెలంగాణ ఉప ఎన్నికల్లో రాజీనామా చేసి తిరిగి పోటీ చేసినవారికే విజయం దక్కనుందని కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్‌ జోస్యం చెప్పారు. వీరంతా భారీ ఆధిక్యంతో గెలుపొందబోతున్నారని స్పష్టం చేశారు. ఏలూరుకు చెందిన ఆర్జీస్‌ సంస్థ ద్వారా జరిపించిన సర్వేలో ఈ విషయం వెల్లడైందని ఆయన మంగళవారం మీడియా ప్రతినిధుల సమావేశంలో తెలిపారు. ఉప ఎన్నికలు జరిగిన 12 స్థానాలకుగానూ 11 చోట్ల సర్వే నిర్వహించామని, ఒక చోట వీలుకాలేదని వెల్లడించారు. ఆ ఒక్క స్థానమేంటో చెప్పడానికి ఆయన నిరాకరించారు. ఈ ఎన్నికల్లో కాంగ్రెస్‌ పార్టీ రెండోస్థానంలో నిలుస్తుందని, తెలుగుదేశం పార్టీకి అన్నిచోట్లా డిపాజిట్లు గల్లంతవుతాయని చెప్పారు. గత ఏడాది డిసెంబరు నుంచి ఈ ఏడాది ఫిబ్రవరి వరకూ తలెత్తిన వివిధ పరిణామాల నేపథ్యంలో రాజీనామా చేసినవారినే గెలిపిద్దామని అన్ని పార్టీలు, ప్రజా సంఘాలు నిర్ణయించుకోవడంవల్లే ఫలితాలు ఇలా ఉండబోతున్నాయని చెప్పారు. ఇది కమిట్ ‌మెంట్‌ ఓటే తప్ప సెంటిమెంట్‌ ఓటు కాదని అభిప్రాయపడ్డారు.

మైనారిటీలు 90శాతం మంది కాంగ్రెస్‌కే అండగా నిలిచారని తెలిపారు. రాజీనామా చేసిన వారినే గెలిపిస్తామని అన్ని పార్టీలూ మాటివ్వడంవల్ల కాంగ్రెస్‌ శ్రేణులు ఓటింగ్‌కు దూరంగా ఉండటమో, రాజీనామా చేసిన వారికే సహకరించడమో జరిగిందని లగడపాటి చెప్పారు. భారీ స్థాయి ఫలితాలు వచ్చిన తర్వాతైనా సెంటిమెంట్‌ ఉందని అంగీకరిస్తారా? అన్న ప్రశ్నకు స్పందిస్తూ - 'నేనెప్పుడూ సెంటిమెంట్‌ లేదని చెప్పలేదు. అది ఒక్కోచోట ఒక్కో విధంగా ఉంది. ఉత్తర తెలంగాణ, దక్షిణ తెలంగాణలకు తేడా ఉంది. నిజామాబాద్ ‌లో రాజీనామా చేసిన బిజెపి హైదరాబాదులోని అంబర్‌ పేటలో ఎందుకు చేయలేదు' అని అన్నారు. తెలంగాణ ప్రజల్లో తెలుగుదేశం నాయకత్వంపట్ల నమ్మకం లేకపోవడంవల్లే ఆ పార్టీ అన్ని స్థానాల్లో డిపాజిట్లు కోల్పోనుందని తెలిపారు. ఏకాభిప్రాయం లేనిదే తెలంగాణ ఏర్పాటు సాధ్యం కాదని ఒక ప్రశ్నకు సమాధానంగా చెప్పారు. ఈ విషయాన్ని ప్రధాన మంత్రి, హోం మంత్రి, వెంకయ్య నాయుడు, అద్వానీ, నితిన్‌ గడ్కరీలు వివిధ సమయాల్లో చెప్పారని పేర్కొన్నారు.