త్వరలో నిత్యానంద స్వామి ఆశ్రమానికి సినీ నటి రంజిత

చెన్నై: నిత్యానంద స్వామితో శృంగారం నెరుపుతూ ఓ టీవీ చానల్ కెమెరాకు అడ్డంగా దొరికిపోయిన సినీ నటి రంజిత త్వరలోనే మళ్లీ ఆశ్రమానికి చేరుకోనుంది. రంజిత రాక పట్ల తమకెలాంటి అభ్యంతరం లేదని నిత్యానంద శిష్యులు అంటున్నారు. రంజితకు భక్తురాలిగా ఆశ్రమంలో ఎప్పుడూ ఆశ్రయం ఉంటుందని నిత్యానంద ప్రధాన శిష్యులు ముత్తు సదానంద, జ్ఞానానంద తదితరులు మంగళవారం మీడియా ప్రతినిధుల సమావేశంలో చెప్పారు. స్వామీజీకి కూడా ఇందులో ఎలాంటి అభ్యంతరం లేదని స్పష్టం చేశారు.

గత 4 నెలలుగా నిత్యానంద గురించి, ఆశ్రమం గురించి మీడియాలో వాస్తవ విరుద్ధ కథనాలు వెలువడ్డాయని, హింసను వీడి, శాంతియుత మార్గంలో నడవాలన్న నిత్యానంద బోధనలకు కట్టుబడి ఇన్నాళ్లూ తాము సంయమనం పాటించామని వారు చెప్పారు. సోమవారం సాయంత్రం ఓ టీవీ చానల్‌లో నిత్యానందను నకిలీ స్వామిగా చిత్రీకరిస్తూ ఓ కథనం ప్రసారమైందని, నటి మాళవిక తన బిడ్డతో వచ్చి నిత్యానంద ఆశీస్సులు పొందడాన్ని వక్రీకరించారని ఆవేదన వ్యక్తం చేశారు. నటి రంజితతో నిత్యానంద ఏకాంతంలో ఉన్నట్లు వెలువడిన వీడియో సన్నివేశాలు వాస్తవం కాదని, ఈ వ్యవహారం కోర్టులో ఉన్నందున తాము అంతకన్నా ఎక్కువ మాట్లాడడం మంచిది కాదని వారన్నారు.