వైయస్ ఉంటే ఇలా ఉండేది కాదు: ఫలితాలపై అంబటి

హైదరాబాద్‌: దివంగత నేత వైయస్ రాజశేఖర రెడ్డి బతికి ఉంటే తెలంగాణ ఉప ఎన్నికల ఫలితాలు ఇలా ఉండేవి కావని కాంగ్రెసు బహిష్కృత నేత అంబటి రాంబాబు వ్యాఖ్యానించారు. మహా నాయకుడు వైయస్ లేని లోటు తెలంగాణ ఉప ఎన్నికల్లో స్పష్టంగా కనిపించిందని ఆయన శుక్రవారం మీడియా ప్రతినిధులతో అన్నారు. త్వరలో తమ నాయకుడు వైయస్ జగన్ తెలంగాణలో పర్యటిస్తారని ఆయన చెప్పారు. తెలంగాణ ఉప ఎన్నికల్లో ముఖ్యమంత్రి కె. రోశయ్య ప్రచారం కూడా చేయలేదని ఆయన అన్నారు.

రెండు ప్రాంతాలు రెండు కళ్లు అన్న తెలుగుదేశం పార్టీ అధ్యక్షుడు నారా చంద్రబాబు నాయుడు ప్రచారానికి కూడా వెళ్లలేని స్థితిలో పడ్డారని ఆయన అన్నారు. ప్రజారాజ్యం పార్టీ అధ్యక్షుడు చిరంజీవి పోటీ చేయడానికే భయపడ్డారని ఆయన అన్నారు. ఎన్నికలకు ముందే కాంగ్రెసు, తెలుగుదేశం, ప్రజారాజ్యం పార్టీలు ఓటమిని అంగీకరించాయని ఆయన అభిప్రాయపడ్డారు.