బాబు పార్టీ పగ్గాలు ఇప్పటికైనా బాలయ్యకివ్వాలి: ప్రసన్న

హైదరాబాద్‌ : పార్టీ పగ్గాలను ఇప్పటికైనా స్వర్గీయ ఎన్టీ రామారావు కుమారుడు, సినీ నటుడు బాలకృష్ణకు అప్పగించాలని తెలుగుదేశం పార్టీ బహిష్కృత నేత నల్లపురెడ్డి ప్రసన్నకుమార్ రెడ్డి నారా చంద్రబాబునాయుడును డిమాండ్ చేశారు. పార్టీ నాయకత్వ బాధ్యతలను బాలకృష్ణకు, జూనియర్ ఎన్టీఆర్ కు అప్పగించాలని ఆయన డిమాండ్ చేశారు. తెలంగాణలో తెలుగుదేశం పార్టీ తుడిచి పెట్టుకుపోయిందని ఆయన అన్నారు. చంద్రబాబు నాయకత్వమే కొనసాగితే రాయలసీమ, ఆంధ్ర ప్రాంతాల్లో కూడా తుడిచి పెట్టుకు పోతుందని ఆయన విరుచుకుపడ్డారు.

తెలంగాణ ఉప ఎన్నికల్లో ప్రచారం చేయలేక చంద్రబాబు బాబ్లీ ప్రాజెక్టు డ్రామా ఆడారని ఆయన వ్యాఖ్యానించారు. తెలంగాణకు వెళ్తే ప్రజలు రాళ్లతో కొడతారని చంద్రబాబు భయపడ్డారని ఆయన అన్నారు. ప్రచారానికి వెళ్తే ప్రజలు తంతారని చంద్రబాబు భయపడ్డారని ఆయన వ్యాఖ్యానించారు.