ఉప్పునీటి సముద్రంలో మంచినీటి బిందువు జగన్: అంబటి

హైదరాబాద్: తమ పార్టీ పార్లమెంటు సభ్యుడు వైయస్ జగన్ ను ఉప్పునీటి సముద్రంలో మంచినీటి బిందువుగా కాంగ్రెసు బహిష్కృత నేత అంబటి రాంబాబు అభివర్ణించారు. తనకు ఇచ్చిన షోకాజ్ నోటీసుకు క్రమశిక్షణా సంఘానికి వివరణ ఇచ్చేందుకు వచ్చిన ఆయన శనివారం మీడియా ప్రతినిధులతో మాట్లాడారు. జగన్ సేవలను సరైన రీతిలో వినియోగించుకోవాలని ఆయన సూచించారు. పార్టీ కార్యాలయం గాంధీభవన్ లో క్రమశిక్షణా సంఘం చైర్మన్, సభ్యులు లేకపోవడంపై ఆయన అశ్చర్యం వ్యక్తం చేశారు. తాను వివరణ ఇవ్వడానికి వస్తే క్రమశిక్షణా సంఘం అడ్రసు లేదని ఆయన వ్యాఖ్యానించారు.

తనను సస్పెండ్ చేసినట్లు పార్టీ అధిష్టానం నుంచి తనకు ఇప్పటి వరకు ఏ విధమైన సమాచారం అందలేదని ఆయన చెప్పారు. పార్టీ రాష్ట్ర వ్యవహారాల ఇంచార్జీ వీరప్ప మొయిలీ కూడా తనను ఎందుకు పార్టీ నుంచి సస్పెండ్ చేశారో చెప్పలేదని ఆయన అన్నారు. తాను మొయిలీకి రాసిన లేఖకు కూడా సమాధానం రాలేదని ఆయన చెప్పారు. తాను ఏ విధమైన పార్టీ వ్యతిరేక కార్యకలాపాలకు పాల్పడలేదని, తనను సస్పెండ్ చేయడం అర్థరహితమని ఆయన అన్నారు. తన సస్పెన్షన్ విషయంలో పార్టీ నిబంధనావళిని పాటించలేదని ఆయన విమర్శించారు. పార్టీ ప్రయోజనాలకు విరుద్ధంగా వ్యవహరిస్తున్న సీనియర్లపై చర్య తీసుకోవాలని ఆయన డిమాండ్ చేశారు.