వైయస్ జగన్ పై తగ్గని కాంగ్రెసు సీనియర్ల దాడి

హైదరాబాద్: ఓదార్పు యాత్ర విషయంలో పార్టీ అధిష్టానాన్ని ధిక్కరిస్తున్న కడప పార్లమెంటు సభ్యుడు వైయస్ జగన్ పై కాంగ్రెసు సీనియర్లు తమ దాడిని ఆపలేదు. జగన్ ఆస్తులపై పాల్వాయి గోవర్దన్ రెడ్డి, అమోస్ శనివారం తీవ్ర వ్యాఖ్యలు చేశారు. జగన్ కు 2004లో ఎన్ని ఆస్తులున్నాయో, ఇప్పుడు ఎన్ని ఆస్తులున్నాయో ప్రజలకు తెలుసునని వారన్నారు. తన సంపాదనతో వైయస్సార్ పేర ఒక ట్రస్టు ఏర్పాటు చేసి మృతుల కుటుంబాలకు ఆర్థిక సహాయం అందిస్తే బాగుంటుందని వారు సలహా ఇచ్చారు.

కాంగ్రెసు సీనియర్ల వ్యాఖ్యలను బట్టి పార్టీ అధిష్టానం జగన్ విషయంలో పునరాలోచన చేయడం లేదని తెలుస్తోంది. పొగ పెట్టడమే పనిగా అధిష్టానం జగన్ పట్ల వ్యవహరిస్తున్నట్లు అర్థం చేసుకోవచ్చు. తెలంగాణ ఉప ఎన్నికల్లో పార్టీ ఓటమిపై జగన్ వర్గం తీవ్ర వ్యాఖ్యలు చేసింది. దీనిపై తెలంగాణ కాంగ్రెసు నాయకులు మండిపడుతున్నారు.