ఉస్మానియా నుంచి గన్ పార్కు వరకు ఇషాన్ రెడ్డి శవయాత్ర

హైదరాబాద్: తెలంగాణ కోసం ఆత్మహత్య చేసుకున్న విద్యార్థి ఇషాన్ రెడ్డి శవయాత్ర ఉస్మానియా విశ్వవిద్యాలయం నుంచి గన్ పార్కుకు సాగుతోంది. ఈ యాత్రలో తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు, బిజెపి నేత విద్యాసాగర రావు, తెలంగాణ జెఎసి నేత కోదండరామ్ తదితర నేతలు పాల్గొంటున్నారు. పోస్టు మార్టం నిర్వహించిన అనంతరం ఇషాన్ రెడ్డి శవయాత్రకు పోలీసులు అనుమతించారు. గన్ పార్కు వద్ద గల అమరవీరుల స్తూపం వద్ద నివాళులు అర్పించిన అనంతరం ఇషాన్ రెడ్డి శవాన్ని మెదక్ జిల్లాలోని స్వగ్రామం తరలిస్తారు.

అంతకు ముందు ఉస్మానియా విశ్వవిద్యాలయంలో తీవ్ర ఉద్రిక్తత నెలకొంది. నాయకులను, బంధువులను తప్ప విద్యార్థులను పోలీసులు శవయాత్రలో వెళ్లడానికి అనుమతించలేదు. విశ్వవిద్యాలయం ప్రధాన ద్వారం వరకు అనుమతించి ఆ తర్వాత ఆపేశారు. దీంతో విద్యార్థులు పోలీసులతో వాగ్వివాదానికి దిగారు. ఎన్నికల్లో విజయం సాధించిన నాయకులు ఇషాన్ మరణ వార్తను విన్న వెంటనే విజయోత్సవాలను రద్దు చేసుకుని హైదరాబాదు బయలుదేరారు.