వచ్చే వారంలో మరో అల్పపీడనం, భారీ వర్ష సూచన

హైదరాబాద్: అల్పపీడనం ఉత్తరప్రదేశ్‌ రాష్ట్రం వైపు తరలిపోవడంతో రాష్ట్రంలో వర్షాలు గణనీయంగా తగ్గాయి. అయితే ఒరిస్సా నుంచి దక్షిణ తమిళనాడు వరకు కోస్తాంధ్ర మీదుగా అల్పపీడన ద్రోణి మాత్రం కొనసాగుతోంది. దీని ప్రభావంతో అక్కడక్కడా తేలికపాటి వర్షాలు కురిసే అవకాశం ఉంది. ఆగస్టు నాలుగో తేదీ కల్లా వాయువ్య బంగాళాఖాతంలో మళ్లీ అల్పపీడనం ఏర్పడే పరిస్థితులు నెలకొన్నాయని విశాఖపట్నంలోని వాతావరణ హెచ్చరికల కేంద్రం అధికారులు అంచనా వేస్తున్నారు.

అల్పపీడనం యూపీ వైపు తరలిపోవడంతో ఆ రాష్ట్రంతో పాటు ఉత్తరాదిలోని పలు రాష్ట్రాల్లో భారీ వర్షాలు కురుస్తున్నాయి. మన రాష్ట్రంలో శుక్రవారం ఉదయం నుంచి శనివారం ఉదయం వరకు తక్కువ వర్షపాతాలే నమోదయ్యాయి. లక్సెట్టిపేట 5 సెంటీమీటర్లు, సంగారెడ్డి 4, నందిగామ, నర్సీపట్నం, బద్వేల్‌, ఉట్నూరు, ఆసిఫాబాద్‌, బోధ్‌, నిర్మల్‌, ఆదిలాబాద్‌లో 3 సెం.మీ.ల చొప్పున వర్షం కురిసింది.

కరీంనగర్‌ జిల్లాలో 25వేల ఎకరాల్లో నీట మునిగిన పత్తి:కరీంనగర్‌ జిల్లాలో మూడు రోజులుగా కురిసిన వర్షాలతో 25 వేల ఎకరాల్లో పత్తి పంట, 1500 ఎకరాల్లో వరి పంట నీట మునిగింది. జిల్లాలో 8 చెరువులు, 57 కుంటలకు గండ్లు పడ్డాయి. వెయ్యి ఇళ్లకు నష్టం వాటిల్లింది.