జగన్ వైయస్ కొడుగ్గా పుట్టడమే తప్పా: కొండా సురేఖ

హైదరాబాద్: వైయస్ కొడుకుగా పుట్టడమే తమ పార్టీ పార్లమెంటు సభ్యుడు వైయస్ జగన్ చేసిన తప్పా అని కాంగ్రెసు శాసనసభ్యురాలు, మాజీ మంత్రి కొండా సురేఖ ప్రశ్నించారు. ఓదార్పు యాత్ర విషయంలో వ్యవహరిస్తున్న తీరును ఆమె మంగళవారం మీడియా ప్రతినిధుల సమావేశంలో అన్నారు. వైయస్ జగన్ బంధువు కాబట్టే శ్రీకృష్ణదేవరాయల విశ్వవిద్యాలయం వైస్ చాన్సలర్ కుసుమకుమారిని తొలగించారని ఆమె విమర్శించారు. జగన్ ను, జగన్ వెంట ఉండేవారని లక్ష్యంగా చేసుకుని పనిచేస్తున్నారని ఆమె ఆవేదన వ్యక్తం చేశారు. జగన్ ఓదార్పు యాత్రను అనుమతించి ఉంటే తెలంగాణ ఉప ఎన్నికల తీరు మరో రకంగా ఉండేదని ఆమె అభిప్రాయపడ్డారు. రాష్ట్ర రాజకీయ పరిస్థితిపై కాంగ్రెసు అధ్యక్షురాలు సోనియా గాంధీ, రాహుల్ గాంధీ, తదితరులకు తాను 11 పేజీల లేఖా రాసి ఫాక్స్ చేసినట్లు ఆమె తెలిపారు.

తాము ప్రభుత్వంలో ఉన్నామో, ప్రతిపక్షంలో ఉన్నామో అర్థం కావడం లేదని ఆమె అన్నారు. ప్రతిపక్షంలో ఉంటే ప్రభుత్వంపై విమర్శలు చేసేవారమని ఆమె అన్నారు. రాష్ట్రంలో బలహీనమైన నాయకత్వం ఉందని ఆమె అభిప్రాయపడ్డారు. రాష్ట్ర పరిస్థితులను అవగతం చేసుకుని తగిన రీతిలో చర్యలు తీసుకోవాలని ఆమె పార్టీ అధిష్టానాన్ని కోరారు. బలమైన వృక్షంగా ఉన్న కాంగ్రెసు పార్టీకి చెందిన ఒక్కో కొమ్మనే నరుక్కుంటూ పోతున్నారని ఆమె అన్నారు. ప్రత్యేక తెలంగాణపై వెంటనే నిర్ణయం తీసుకోవాలని ఆమె సోనియాను కోరారు. ఉప ఎన్నికల్లో తెలంగాణ సెంటిమెంటు వ్యక్తమైన తీరును గమనించి ప్రత్యేక రాష్ట్రం ఏర్పాటుపై నిర్ణయం తీసుకోవాల్సిన అవసరం ఉందని ఆమె అన్నారు.