కుసుమకుమారి ఉద్వాసనలో రాజకీయం లేదు: శ్రీధర్ బాబు

హైదరాబాద్: శ్రీకృష్ణ దేవరాయ విశ్వవిద్యాలయం వైస్ చాన్సలర్ గా కుసుమకుమారి తొలగింపులో ఏ విధమైన రాజకీయం లేదని రాష్ట్ర ఉన్నత విద్యామంత్రి శ్రీధర్ బాబు స్పష్టం చేశారు. ఎన్ని అవకాశాలు ఇచ్చినా కుసుమ కుమారి తన పద్ధతి మార్చుకోలేదని ఆయన మంగళవారం మీడియా ప్రతినిధుల సమావేశంలో అన్నారు. వైయస్ జగన్ మనిషిని కాబట్టే తనను తొలగించారని కుసుమ కుమారి చేసిన వ్యాఖ్యను ఆయన తప్పు పట్టారు.

అక్రమాలు జరిగాయి కాబట్టే కుసుమ కుమారిని తొలగించామని, అది హన్మంతు నివేదిక ఆధారంగానే జరిగిందని ఆయన స్పష్టం చేశారు. విసిగా ఉంటూ రాజకీయాలు మాట్లాడడం నైతికంగా సరి కాదని ఆయన అన్నారు.విద్యా వ్యవస్థను కాపాడేందుకే కుసుమ కుమారిపై చర్యలు తీసుకున్నామని ఆయన చెప్పారు. విసిగా పని చేసిన వ్యక్తి రాజకీయాలు మాట్లాడడం ఆశ్చర్యంగా ఉందని ఆయన అన్నారు.