తెలంగాణపై పార్టీ సీనియర్లకు చంద్రబాబు నాయుడు క్లాస్

హైదరాబాద్: తెలంగాణపై తెలుగుదేశం పార్టీ అధ్యక్షుడు నారా చంద్రబాబు పార్టీ సీనియర్ నేతలకు క్లాస్ తీసుకున్నారు. తాజా రాజకీయ పరిణామాలపై, బాబ్లీ వ్యవహారంపై చర్చించడానికి ఆయన గురువారం పార్టీ సీనియర్లతో సమావేశమయ్యారు. స్వప్రయోజనాల కోసం పార్టీ ప్రయోజనాలను తాకట్టు పెట్టవద్దని ఆయన హెచ్చరించారు. సున్నితమైన తెలంగాణ అంశంపై ఎవరూ మాట్లాడవద్దని, ప్రజా సమస్యలపై పని చేయాలని ఆయన తెలంగాణ, సీమాంధ్ర నాయకులను ఆదేశించారు. తెలంగాణ అంశాన్ని తనకు వదిలేయాలని ఆయన చెప్పారు. చంద్రబాబు క్లాస్ ను పార్టీ సీనియర్లు కిమ్మనకుండా విన్నారు.

బాబ్లీ ప్రాజెక్టుపై శ్రీరాంసాగర్‌ పరివాహకప్రాంతంలో పాదయాత్ర నిర్వహించాలని తెలుగుదేశం నిర్ణయించింది.ఈ పాదయాత్రలో తెలుగుదేశం పార్టీ అధినేత చంద్రబాబునాయుడు పాల్గొననున్నారు. అన్నీ రాజకీయపక్షాల నేతలను ఈ యాత్రలో కలుపుకుపోవాలని పార్టీ పొలిట్ ‌బ్యూరో సమావేశంలో నిర్ణయించారు. బాబ్లీపై గ్రామస్థాయిలో రైతుల్ని చైతన్యం చేసేందుకు అవగాహన కల్పిస్తామని తెలుగుదేశం నేత ఎర్రబెల్లి దయాకరరావు తెలిపారు. శ్రీరాంసాగర్ ప్రాజెక్టు పరిరక్షణకు ఓ కమిటీ వేయాలని నిర్ణయించారు. ఈ కమిటీలో ఎర్రబెల్లి ప్రధాన పాత్ర పోషిస్తారు. ఇతర పార్టీలతో కలిపి ఈ కమిటీ వేస్తామని ఎర్రబెల్లి దయాకర రావు చెప్పారు. తమ యాత్ర తర్వాత కూడా కేంద్ర ప్రభుత్వం దిగి రాకపోతే చంద్రబాబు తెలంగాణ జిల్లాల్లో పాదయాత్ర చేస్తారని ఆయన చెప్పారు.