విశాఖపట్నం యాక్సెస్ బ్యాంక్ వద్ద భారీ దోపిడీ

విశాఖపట్నం: విశాఖపట్నంలో శుక్రవారం మధ్యాహ్నం భారీ దోపిడీ జరిగింది. శుక్రవారం మధ్యాహ్నం 12 గంటల ప్రాంతంలో ద్వారకానగర్ సమీపంలో యాక్సిస్ బ్యాంక్ ఏటీయం దగ్గర సెక్యూరిటీ వాహనం నుంచి గుర్తు తెలియని దుండగులు పథకం ప్రకారం 13 లక్షల రూపాయలు ఉన్న సూట్‌ కేస్‌ ను అపహరించారు. యాక్సిస్ బ్యాంక్ నుంచి 13 లక్షల రూపాయలను ఏటీయం మిషన్‌ లో వేయడానికి ఓ ప్రైవేటు సెక్యూరిటీ ఏజెన్సీ సిబ్బంది వాహనంలో పెట్టి తిరిగి బ్యాంక్‌ లోకి వెళ్లి బయటకు వచ్చే సమయంలో నగదు ఉన్న సూట్ కేస్ మాయమయ్యింది.

దుండగులు పథకం ప్రకారం ఆ ప్రదేశంలో 10 రూపాయల నోట్లు రోడ్డుపై వెదజల్లారు. సిబ్బంది వాటిని తీసుకుంటుండగా దుండగులు వాహనంలో నుంచి డబ్బు ఉన్న సూట్‌ కేస్‌ ను తీసుకుని పరారయ్యారు. సమాచారం తెలుసుకున్న పోలీసులు వెంటనే బ్యాంక్‌ కు చేరుకుని సమీక్షించి, కేసు నమోదు చేసుకుని, దర్యాప్తు సాగిస్తున్నారు. నెల్లూరు కపట్టాల ప్రాంతానికి చెందిన దుండగులే ఇలాంటి దొంగతనాలకు పాల్పడతారని పోలీసులు భావిస్తున్నారు.