మరో అల్పపీడన ద్రోణి, రాష్ట్రమంతటా వర్ష సూచన

విశాఖపట్నం: మరో అల్పపీడన ద్రోణి వల్ల రాష్ట్రమంతటా మళ్ళీ వర్షాలు కురిసే అవకాశముంది. వాయవ్య బంగాళాఖాతంలో ఒరిస్సా తీరానికి సమీపంలో బుధవారం ఏర్పడ్డ అల్పపీడనం శనివారం నాటికి బలహీనమైంది. పశ్చిమ వాయవ్యదిశగా కదిలి పశ్చిమ మధ్యప్రదేశ్‌ వైపు వెళ్లి బలహీనమైపోవడంతో ఆ ప్రభావం తెలంగాణపై కనిపించింది. గత రెండు రోజులుగా తెలంగాణ జిల్లాల్లో భారీ వర్షాలు కురుస్తున్నాయి.

అదే సమయంలో ఓ అల్పపీడన ద్రోణి ఒరిస్సా నుంచి దక్షిణ తమిళనాడు వరకు వ్యాపించి ఉంది. దీంతో రాగల 24 గంటల్లో కోస్తా, తెలంగాణ, రాయలసీమల్లో అక్కడక్కడా వర్షాలు, ఉరుములతో కూడిన జల్లులు కురిసే అవకాశం ఉందని విశాఖలోని వాతావరణ హెచ్చరికల కేంద్రం అధికారులు పేర్కొంటున్నారు. శుక్రవారం ఉదయం నుంచి శనివారం నాటికి తెలంగాణలోని పలు ప్రాంతాల్లో రికార్డు స్థాయిలో వర్షాలు కురిశాయి.