చిరంజీవిపై రాజశేఖర్ దంపతుల పాత పగ కొత్తగా?

హైదరాబాద్‌: ప్రజారాజ్యం పార్టీ అధినేత చిరంజీవి కాంగ్రెసు కడప పార్లమెంటు సభ్యుడు వైయస్ జగన్ పై ఆరోపణాస్త్రాలు సంధించిన వెంటనే సినీ నటుడు రాజశేఖర్, జీవిత దంపతులు తెర మీదికి వచ్చారు. చిరంజీవిపై తీవ్ర వ్యాఖ్యలు, ఆరోపణలు చేస్తూ వారు మీడియాకు ఎక్కారు. ఈ సినీ దంపతులు దివంగత నేత వైయస్ రాజశేఖర రెడ్డికి అత్యంత సన్నిహితులు, ఇప్పుడు వైయస్ జగన్ కు కావాల్సినవాళ్లు. చిరంజీవి కాంగ్రెసుకు దగ్గరవుతుండడంతో దాన్ని అడ్డుకోవడానికి వారిద్దరు రంగంలోకి దిగినట్లు భావిస్తున్నారు. తనకు దక్కాల్సిన ఠాగూర్ హక్కులను మాయ చేసి చిరంజీవి దక్కించుకున్నారనే కోపం తనకు ఉందని రాజశేఖర్ తాజాగా కూడా చెప్పారు. అది మాత్రమే ప్రస్తుత ఆరోపణలకు కారణం కాదని, బ్లడ్ బ్యాంక్ పేర చిరంజీవి అక్రమాలకు పాల్పడుతున్నారని జీవిత, రాజశేఖర్ దంపతులు అన్నారు.

చిరంజీవిపైకి అస్త్రాలు దూయడానికి సిద్ధంగా ఉన్న రాజశేఖర్, జీవితను దించడమే మంచిదని జగన్ వర్గీయులు భావించి వారిని దించినట్లు అనుమానిస్తున్నారు. వారి వెనక వేరే వారు ఉన్నారని ప్రజారాజ్యం పార్టీ నాయకులు ఆరోపించడంలోని అంతరార్థం అదే. జీవిత, రాజశేఖర్ లపై గతంలో చిరు అభిమానులు హైదరాబాదులో దాడి చేశారు. ఈ సమయంలో చిరంజీవి స్వయంగా వారి ఇంటికి వెళ్లి క్షమాపణలు కోరారు. అటువంటి ఘర్షణను ఆశించే రాజశేఖర్, జీవిత చిరంజీవిపై తీవ్ర వ్యాఖ్యలు చేశారా అనే అనుమానాలు కూడా వ్యక్తమవుతున్నాయి.