తెరాస అధ్యక్షుడు కె చంద్రశేఖర రావు సోనియా గాంధీ తాబేదారా?

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కాంగ్రెసు అధ్యక్షురాలు సోనియా గాంధీ తాబేదారని తెలుగుదేశం నాయకుడు రేవంత్ రెడ్డి అభివర్ణించారు. తమ పార్టీ నేత హరికృష్ణపై కెసిఆర్ చేసిన వ్యాఖ్యలకు ఆయన గురువారం మీడియా ప్రతినిధుల సమావేశంలో తీవ్రంగా మండిపడ్డారు. ఏ దేశం నుంచో వచ్చిన సోనియా గాంధీని అంగీకరిస్తారు గానీ ఇంటి పక్కన ఉన్న చంద్రబాబును అంగీకరించడానికి కెసిఆర్ సిద్ధంగా లేరని ఆయన అన్నారు. కెసిఆర్ ఉద్యమ నాయకుడు కారని, రాజకీయ నాయకుడని ఆయన అభిప్రాయపడ్డారు. ఉద్యమ నాయకుడు తెలంగాణ సాధనను ప్రధానం చేసుకుంటారు గానీ ఎన్నికలను ప్రధానం చేసుకోరని ఆయన అన్నారు.

తమ తెలుగుదేశం పార్టీని తుడిచిపెట్టేందుకు కెసిఆర్ చిల్లర మల్లర మాటలు మాట్లాడుతున్నారని ఆయన విమర్శించారు. కెసిఆర్ వానపాములాంటి వాడని, కాలం కలిసొస్తే వానపాము కూడా బుసకొడుతుందని ఆయన అన్నారు. తెలంగాణ ఉద్యమం సమయంలో కెసిఆర్ పై పెట్టిన కేసులను ఎత్తేశారని, విద్యార్థుల మీద మాత్రం ఎత్తేయలేదని, దీన్ని బట్టే కెసిఆర్ ఎవరికి దగ్గరో అర్థమవుతుందని ఆయన అన్నారు.