జయలలిత అన్నాడియంకెలోకి సినీ నటి రోజా?

చెన్నై: ప్రముఖ సినీ నటి రోజా తమిళ రాజకీయాల్లో అడుగు పెట్టబోతున్నట్లు ఊహాగానాలు చెలరేగుతున్నాయి. వైయస్ రాజశేఖర రెడ్డి మరణం తర్వాత ఆంధ్రప్రదేశ్ రాజకీయాల్లో నెలకొన్న అనిశ్చితి ఆమెకు చోటు లేకుండా చేశాయని అంటున్నారు. దీంతో ఆమె తమిళ రాజకీయాల్లో కీలక పాత్ర పోషించాలని నిర్ణయించుకున్నట్లు ప్రచారం జరుగుతోంది. ఆమె జయలలిత నాయకత్వంలోని అన్నాడియంకెలో చేరుతున్నట్లు కూడా చెబుతున్నారు. ఇటీవల ఆమె జయలలితను కలిసినట్లు, అందుకు జయలలిత పచ్చ జెండా ఊపినట్లు సమాచారం.

వైయస్ రాజశేఖర రెడ్డి ప్రోద్బలంతో రోజా తెలుగుదేశం పార్టీకి రాజీనామా చేసి కాంగ్రెసు పార్టీలో చేరడానికి సిద్ధపడ్డారు. అయితే కాంగ్రెసులో చేరక ముందే వైయస్ మరణించడంతో ఆమె రాజకీయ భవిష్యత్తు సందేహంలో పడింది. తిరిగి తెలుగుదేశం పార్టీలోకి వెళ్లనున్నట్లు వార్తలు వచ్చినా అక్కడ తిరిగి పూర్వ వైభవం కష్టమనే అభిప్రాయానికి రోజా వచ్చింది. కాంగ్రెసులోని అంతర్గత పోరు ఆమెను తీవ్ర సందిగ్ధంలో పడేసింది. దాంతో ఆమె తమిళ రాజకీయాల పట్ల మొగ్గు చూపినట్లు చెబుతున్నారు.