కె చంద్రశేఖర రావుపై హరికృష్ణ దాడి మతలబు ఏమిటి?

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుపై తెలుగుదేశం పార్టీ రాజ్యసభ సభ్యుడు, పార్టీ అధ్యక్షుడు నారా చంద్రబాబు నాయుడు బావ మరిది హరికృష్ణ తీవ్రంగా దాడి చేస్తూ బహిరంగ లేఖ రాయడం చర్చనీయాంశంగా మారింది. ఇంత తీవ్రంగా హరికృష్ణ లేఖ రాయడంలో ఎవరి ఒత్తిడి ఉందనేది కూడా ప్రశ్నార్థకంగా మారింది. తెలంగాణ ఉప ఎన్నికల్లో 12 శాసనసభా స్థానాల్లో కూడా తెలుగుదేశం పార్టీ డిపాజిట్లు కోల్పోవడంతో చంద్రబాబు తీవ్ర నిరాశకు గురయ్యారు. అప్పటి నుంచి ఆయన కెసిఆర్ పై ఎడతెరిపి లేకుండా విమర్శలు చేస్తున్నారు. తెలంగాణ పట్ల తన వైఖరిని రకరకాలుగా సమర్థించుకునే ప్రయత్నం చేస్తున్నారు. దాన్ని తెరాస నాయకులు తిప్పి కొడుతున్నారు. ఈ స్థితిలో తెలుగుదేశం తెలంగాణ నాయకులు ఒకరిద్దరు తప్ప ఎవరూ నోరు విప్పడం లేదు. ఆ ఒక్కరిద్దరు కూడా గట్టిగా మాట్లాడడం లేదు. దీంతో చంద్రబాబు తీవ్ర అసంతృప్తితో ఉన్నారు.

పార్టీ సీనియర్ నాయకుల సమావేశాల్లో పలు మార్లు చంద్రబాబు ఆ విషయాన్ని ప్రస్తావించారు. తెరాస దాడులను తిప్పి కొట్టాలని ఆయన తెలంగాణ సీనియర్ నాయకులకు సూచించారు. అయినా, నాగం జనార్దన్ రెడ్డి వంటి నాయకులు పెద్దగా మాట్లాడడం లేదు. తెలుగుదేశం పార్టీని దెబ్బ తీసేందుకు కెసిఆర్ కుట్ర చేస్తున్నారని చంద్రబాబు విమర్శిస్తున్నారు. ఒక పార్టీ దెబ్బ తినకుండా తగిన విధానాలను, వైఖరులను తీసుకోవాల్సి ఉంటుంది. దాన్ని విస్మరించి చంద్రబాబు కెసిఆర్ పై ఎదురుదాడి చేయాలని సూచించడం తెలంగాణ టిడిపి నాయకులకు రుచించడం లేదు. ఎదురు దాడి ఎలా చేయాలో కూడా వారికి తెలియడం లేదు. ఈ స్థితిలోనే హరికృష్ణ కెసిఆర్ కు బహిరంగ లేఖ రాశారు.