వైయస్ జగన్ వేదిక తిరుపతి: తేదీ వైయస్ వర్ధంతి సెప్టెంబర్ 2

హైదరాబాద్: కాంగ్రెసు కడప పార్లమెంటు సభ్యుడు వైయస్ జగన్ రాజకీయ భవిష్యత్తుకు సంబంధించిన వ్యూహాన్ని ఖరారు చేసుకున్నట్లు అర్థమవుతోంది. తన తండ్రి వైయస్ రాజశేఖర రెడ్డి సంస్మరణ సభకు ఏర్పాట్లు చేసుకుంటున్నారు. దీనికి సంబంధించి ఆయన శుక్రవారం తన నివాసంలో తన వర్గం నాయకులతో చర్చించారు. తిరుపతిలో సెప్టెంబర్ 2వ తేదీ వైయస్ సంస్మరణ సభను ఖరారు చేశారు. శుక్రవారం అందుకు సంబంధించిన పోస్టరును కూడా విడుదల చేశారు.

తిరుపతి సభలో జగన్ తన భవిష్యత్తు రాజకీయ కార్యక్రమాన్ని ప్రకటించే అవకాశాలున్నట్లు చెబుతున్నారు. ఆయన అదే రోజు తన పార్టీ పేరును ప్రకటిస్తారని అంటున్నారు. జగన్ నిర్ణయాన్ని పూర్తిగా అవగాహన చేసుకున్నందు వల్లనే పార్టీ అధిష్టానం మరింతగా ఉచ్చు బిగిస్తున్నట్లు తెలుస్తోంది.