భార్యను చంపిన ఇన్ఫోసిస్ మేనేజర్ అరెస్టు

బెంగళూరు: భార్యను హత్య చేసిన కేసులో ఇన్ఫోసిస్‌ ఉద్యోగిని బెంగళూర్ పోలీసులు అరెస్టు చేశారు. సతీష్‌కుమార్‌ గుప్తా ఇన్ఫోసిస్‌లో మానవవనరుల విభాగంలో మేనేజర్‌గా పనిచేస్తున్నారు. ఆయన భార్య ప్రియాంక మంగళవారం తన నివాసంలో మృతి చెంది కనిపించింది. ఆమె ఢిల్లీ పబ్లిక్‌ స్కూల్‌లో ఉపాధ్యాయురాలిగా పనిచేస్తున్నారు. మూడేళ్ల క్రితం వీరికి వివాహమైంది. సతీష్‌ను కోర్టులో హాజరుపరచనున్నట్లు బెంగళూరు డీసీపీ బీఎన్‌ఎస్‌ రెడ్డి తెలిపారు. మంగళవారం ఉదయం సతీష్ గుప్తా తన భార్యను చంపినట్లు వెల్లడైంది.

తన భార్యను చంపినట్లు సతీష్ గుప్తా శుక్రవారంనాడు అంగీకరించాడు. దీంతో అతన్ని ఆ సాయంత్రమే అరెస్టు చేశారు. తాను హత్య చేయలేదని చెప్పడానికి సతీష్ కట్టుకథలు అల్లాడు. వాటిని పోలీసులు నమ్మలేదు. లోపలి వ్యక్తే ఆమెను హత్య చేసి ఉంటాడనే కోణం నుంచి దర్యాప్తు చేసి నిందితుడిని పట్టుకున్నారు. ప్రియాంకను హత్య చేసినట్లు అంగీకరించిన సతీష్ తాను ఆమెను అమితంగా ప్రేమిస్తున్నట్లు చెప్పుకున్నాడు.