అధిష్టానం మాట వినకుంటే జగన్ కు పుట్టగతులుండవు: శంకరరావు

హైదరాబాద్: దివంగత నేత వైయస్ రాజశేఖర రెడ్డి వ్యవహారాలపై కాంగ్రెసు సీనియర్ శాసనసభ్యుడు పి. శంకరరావు శనివారం తీవ్రంగా ధ్వజమెత్తారు. కడప పార్లమెంటు సభ్యుడు వైయస్ జగన్ పై కూడా ఆయన తీవ్ర విమర్శలు చేశారు. పార్టీ అధిష్టానం మాట వినకపోతే వైయస్ జగన్ కు పుట్టగతులుండవని ఆయన మీడియా ప్రతినిధుల సమావేశంలో అన్నారు. వైయస్ కుటుంబ సభ్యులు, బంధుమిత్రులు మధు కోడాలను మించిపోయారని ఆయన ఆరోపించారు. అనతి కాలంలోనే కుబేరులయ్యారని, కోట్లాది రూపాయలు ఆర్జించారని ఆయన ఆరోపించారు.

వైయస్ కుటుంబ సభ్యులు, బంధు మిత్రులు అతి కొద్ది కాలంలోనే ఎలా కుబేరులయ్యారని ఆయన ప్రశ్నించారు. వైయస్ 15 ఏళ్ల క్రితం అప్పుల్లో ఉన్నారని, కొద్ది కాలంలోనే వైయస్ కుటుంబ సభ్యులకు ఎనలేని సంపద చేకూరిందని ఆయన అన్నారు. ఈ వ్యవహారాలపై సిబిఐ విచారణ జరిపించాలని ఆయన డిమాండ్ చేశారు.