వైయస్ జగన్ నాకు శత్రువు కాడు, ఆయన్నూ కలుస్తా: జెసి దివాకర్ రెడ్డి

న్యూఢిల్లీ: తమ పార్టీ కడప పార్లమెంటు సభ్యుడు వైయస్ జగన్ తనకు శత్రువు కాడని, తాను జగన్ ను కూడా కలుస్తానని కాంగ్రెసు సీనియర్ శాసనసభ్యుడు జెసి దివాకర్ రెడ్డి అన్నారు. కేంద్ర మంత్రి పనబాక లక్ష్మి నివాసంలో ప్రకాశం జిల్లా శాసనసభ్యుల సమావేశం తర్వాత ఆయన బుధవారం మీడియాతో మాట్లాడారు. తాను సొంత పనుల మీదనే ఢిల్లీ వచ్చానని, తనకు చాలా పనులుంటాయని ఆయన అన్నారు. పనబాక లక్ష్మిని తాను తరుచూ కలుస్తుంటానని, ఇందులో ప్రత్యేకత ఏమీ లేదని ఆయన అన్నారు.

కాంగ్రెసుతో తనది 30 ఏళ్ల అనుభవమని, సోనియానూ అహ్మద్ పటేల్ నూ కలుసుకోవడంలో రాజకీయ ప్రాధాన్యత ఏదీ లేదని ఆయన అన్నారు. జగన్ ఓదార్పు యాత్ర విషయంలో పార్టీ అధిష్టానానిదే తుది నిర్ణయమని కేంద్ర మంత్రి పనబాక లక్ష్మి అన్నారు. పార్టీ అధిష్టానం ఆదేశాల మేరకు తాము నడుచుకుంటామని ఆమె చెప్పారు.