వైయస్ జగన్ కు అండగా ఉండడం తప్పా: కొండా సురేఖ

హైదరాబాద్: తాము జగన్ కు అండగా ఉండడం తప్పా అని కాంగ్రెసు శాసనసభ్యురాలు కొండా సురేఖ ముఖ్యమంత్రి కె. రోశయ్యను ప్రశ్నించారు. తన కుటుంబ సభ్యులకు గన్ మెన్లను తగ్గించడంపై ముఖ్యమంత్రిపై ఆమె విరుచుకుపడ్డారు. ముఖ్యమంత్రిని తీవ్రంగా విమర్శిస్తూ ఆమె పార్టీ అధిష్టానానికి మరో లేఖ రాసింది. ఆ లేఖ వివరాలను ఆమె బుధవారం మీడియా ప్రతినిధుల సమావేశంలో వివరించారు. జగన్ వెంట వెళ్లకూడదని నాయకులపై ఒత్తిడి తేగలరని, అయితే ప్రజలంతా జగన్ వెంటనే ఉన్నారని ఆమె అన్నారు. వరంగల్ జిల్లాలో ఓదార్పు యాత్ర సందర్భంగా జగన్ ఇంట్లోనే అరెస్టు చేయకుండా, మార్గమధ్యంలో అరెస్టు కావాలనే శాంతిభద్రతల సమస్యను సృష్టించారని ఆమె విమర్శించారు. మహబూబాబాద్ లో తనపై దాడి జరిగితే ఆ కేసును ఏ మాత్రం పట్టించుకోవడం లేదని ఆమె అన్నారు.

తమ కుటుంబానికి ప్రభుత్వం గన్ మెన్లను తగ్గించి, తన నియోజకవర్గంలోని తెలుగుదేశం పార్టీ ఇంచార్జీకి పెంచారని ఆమె విమర్శించారు. దురుద్దేశపూరితంగానే తమకు గన్ మెన్లను తగ్గించారని ఆమె విమర్శించారు. తమకు ప్రాణహాని జరిగితే ముఖ్యమంత్రి బాధ్యత వహించాల్సి ఉంటుందని ఆమె హెచ్చరించారు. తమను ఇబ్బంది పెట్టేందుకే పోలీసు అధికారులను బదిలీ చేస్తున్నారని, తమ నియోజకవర్గంలో పోలీసులను తమకు చెప్పకుండా బదిలీ చేస్తున్నారని ఆమె విమర్శించారు. జగన్ కడప జిల్లా ఎస్పీనే బదిలీ చేసినప్పుడు తామెంత అని ఆమె అన్నారు. తనకు అధిష్టానం షోకాజ్ నోటీసు ఇచ్చినట్లు మీడియాలో వార్తలు రావడం వెనక ముఖ్యమంత్రి హస్తం ఉందని ఆమె విమర్శించారు. తమను ఇబ్బంది పెట్టినా ఫర్వాలేదని, అయితే తన అనుచరులను ఇబ్బంది పెట్టవద్దని ఆమె అన్నారు. తమ అనుచరులపై తప్పుడు కేసులు బనాయించారని ఆమె ఆరోపించారు. తెలుగుదేశం పార్టీ నాయకుడు ఎర్రబెల్లి దయాకర్ రావుపై ఆమె తీవ్రంగా విరుచుకుపడ్డారు. ఆయనను ఆమె రాజకీయ వ్యభిచారిగా అభివర్ణించారు.