'సత్యం' రామలింగ రాజుకు హైకోర్టు షరతులతో బెయిల్

హైదరాబాద్: ఎట్టకేలకు సత్యం కంప్యూటర్స్ మాజీ చైర్మన్ రామలింగరాజుకు బెయిల్ లభించింది. హైకోర్టు బుధవారం రామలింగరాజుకు షరతులతో కూడిన బెయిల్ మంజూరు చేసింది.20 లక్షల పూచీకత్తుపై బెయిల్ మంజూరైంది. దేశం విడిచి వెళ్లరాదని హైకోర్టు రామలింగరాజును ఆదేశించింది. ప్రతిరోజూ పోలీసు స్టేషన్ లో సంతకం చేయాలని కూడా ఆదేశించింది. సిబిఐ అధికారులకు అందుబాటులో ఉండాలని కూడా హైకోర్టు ఆదేశించింది. రామలింగ రాజు పాస్ పోర్టు పోలీసులు స్వాధీనంలోనే ఉంది. అయితే కొన్ని మినహాయింపులు కూడా ఇచ్చింది. అనారోగ్యం నుంచి కోలుకునే వరకు పరిశోధనాధికారి ముందు రామలింగరాజు హాజరు కావాల్సిన అవసరం లేదని హైకోర్టు స్పష్టం చేసింది. ఆరోగ్యం కుదుట పడిన తర్వాత విచారణకు హాజరు కావాల్సి ఉంటుందని తెలిపింది.

రామలింగరాజుకు కొంత కాలం పాటు బెయిల్ ఇవ్వకూడదని కోరుతూ సిబిఐ దాఖలు చేసిన పిటిషన్ ను హైకోర్టు కొట్టేసింది. గత 19 నెలలుగా ఆయన జైలు జీవితం గడుపుతున్నారు. అయితే అనారోగ్యం కారణంగా గత 52 వారాలుగా నిజాం వైద్య విజ్ఞాన సంస్థ (నిమ్స్)లో చికిత్స పొందుతున్నారు. మరో ఆరు వారాల పాటు రామలింగరాజుకు వైద్యం అవసరమని నిమ్స్ వైద్యులు చెప్పారు. సత్యం కుంభకోణం కేసులోని నిందితులందరికీ బెయిల్ లభించింది. ఏడు వేల కోట్ల సత్యం కంప్యూటర్స్ కుంభకోణంలో రామలింగరాజు 2009 జనవరి 8వ తేదీన అరెస్టయ్యారు. హైకోర్టు బెయిల్ మంజూరును సవాల్ చేస్తూ సిబిఐ సుప్రీంకోర్టుకు వెళ్లే అవకాశం ఉంది.